Tibetan Teachings from Great Masters

So many compassionate and wise masters have left footprints in Tibet. 

Tibet became a journey destination, not only for materialism Travelers but also for spiritualism Travelers. 

The blessing is beyond the sky as long as we have devotion. 

The great masters have long gone from our world but the precious teaching remains and it is very important to preserve them for the future generations since the teachings are the map to the land of nirvana. The full enlightenment journey. 

Today I would like to share a few of the Tibetan language teachings that I have recorded and hope these can be helpful for Travelers having karmic connections with Buddha. 

May the merit brings permanent happiness and enlightenment to all beings. 

Prajnaparamita Sutra (Perfection of wisdom) Tibetan Audio Book 

བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ།

༄༅། །རྒྱ་གར་སྐད་དུ། བྷ་ག་ཝ་ཏི་པྲ་ཛྙ་པ་ར་མི་ཏཱ་ཧྲི་ད་ཡ། །བོད་སྐད་དུ། །བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ། བམ་པོ་གཅིག་གོ །འདི་སྐད་བདག་གིས་ཐོས་པ་དུས་གཅིག་ན། །བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ་དགེ་སློང་གི་དགེ་འདུན་ ཆེན་པོ་དང་། །བྱང་ཆུབ་སེམས་དཔའི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། །དེའི་ཚེ་བཅོམ་ལྡན་འདས་ཟབ་མོ་སྣང་བ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཏིང་ ངེ་འཛིན་ལ་སྙོམས་པར་ཞུགས་སོ། །ཡང་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ ཕྱུག་ཤེས་རབ་ཀྱི་ཕ་རོལ་ཏུ་ཟབ་མོའི་སྤྱོད་པ་ཉིད་ལ་རྣམ་པར་བལྟ་ཞིང་ཕུང་པོ་ལྔ་ པོ་དེ་དག་ལ་ཡང་རང་བཞིན་གྱིས་སྟོང་པར་རྣམ་པར་བལྟའོ། །དེ་ནས་སངས་རྒྱས་ཀྱི་མཐུས། །ཚེ་དང་ལྡན་པ་ཤཱ་རིའི་བུས་བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །རིགས་ཀྱི་བུ་གང་ལ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱོད་པ་སྤྱད་པ་ འདོད་པ་དེས་ཇི་ལྟར་བསླབ་པར་བྱ། །དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་ཚེ་ དང་ལྡན་པ་ཤཱ་ར་དྭ་ཏའི་བུ་ལ་འདི་སྐད་ཅེས་སྨྲས་སོ། །ཤཱ་རིའི་བུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཤེས་རབ་ཀྱི་ཕ་རོལ་ཏུ་ཟབ་མོའི་སྤྱོད་པ་སྤྱད་པར་འདོད་ པ་དེས་འདི་ལྟར་རྣམ་པར་བལྟ་བར་བྱ་སྟེ། །ཕུང་པོ་ལྔ་པོ་དེ་དག་ཀྱང་རང་བཞིན་གྱིས་སྟོང་པར་རྣམ་པར་ཡང་དག་པར་རྗེས་སུ་ བལྟའོ། །གཟུགས་སྟོང་པའོ། སྟོང་པ་ཉིད་གཟུགས་སོ། །གཟུགས་ལས་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །དེ་བཞིན་དུ་ཚོར་བ་དང་། །འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་སྟོང་པའོ། །ཤཱ་ཏིའི་བུ། །དེ་ལྟར་ཆོས་ཐམས་ཅད་སྟོང་པ་ཉིད་དེ། མཚན་ཉིད་མེད་པ། མ་སྐྱེས་པ། །མ་འགགས་པ། དྲི་མ་མེདཔ། དྲི་མ་དང་བྲལ་བ་མེད་པ། །བྲི་བ་མེད་པ། གང་བ་མེད་པའོ། །ཤཱ་རིའི་བུ། དེ་ལྟ་བས་ན་སྟོང་པ་ཉིད་ལ་གཟུགས་མེད། ཚོར་བ་མེད། །འདུ་ཤེས་མེད། འདུ་བྱེད་མེད། རྣམ་པར་ཤེས་པ་མེད། མིག་མེད། རྣ་བ་མེད། སྣ་མེད། ལྕེ་མེད། ལུས་མེད། ཡིད་མེད། གཟུགས་མེད།སྒྲ་མེད། དྲི་མེད། རོ་མེད། རེག་བྱ་མེད། ཆོས་མེད་དོ། །མིག་གི་ཁམས་མེད་པ་ནས་ཡིད་ཀྱི་ཁམས་མེད། །ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུའང་མེད་དོ། །མ་རིག་པ་མེད། །མ་རིག་པ་ཟད་པ་མེད་པ་ནས་རྒ་ཤི་་མེད། །རྒ་ཤི་ཟད་པའི་བར་དུའང་མེད་དོ། དེ་བཞིན་དུ་སྡུག་བསྔལ་བ་དང་། ཀུན་འབྱུང་བ་དང་། འགོག་པ་དང་། ལམ་མེད། ཡེ་ཤེས་མེད། ཐོབ་པ་མེད། མ་ཐོབ་པའང་མེད་དོ། །ཤཱ་རིའི་བུ། དེ་ལྟ་བས་ན་བྱང་ཆུབ་སེམས་དཔའ་རྣམས་ཐོབ་པ་མེད་པའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ཅིང་གནས་ཏེ་སེམས་ལ་སྒྲིབ་པ་མེད་པས་ སྐྲག་པ་མེད་དེ། ཕྱིན་ཅི་ལོག་ལས་ཤིན་ཏུ་འདས་ནས་མྱ་ངན་ལས་འདས་པར་མཐར་ཕྱིན་ཏོ། །དུས་གསུམ་དུ་རྣམ་པར་བཞུགས་པའི་སངས་རྒྱས་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ ཕྱིན་པ་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་ རྫོགས་པར་སངས་རྒྱས་སོ། །དེ་ལྟ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས། རིག་པ་ཆེན་པོའི་སྔགས། བླ་ན་མེད་པའི་སྔགས། མི་མཉམ་པ་དང་མཉམ་པར་བྱེད་པའི་སྔགས། མི་རྫུན་པས་ན་བདེན་པར་ཤེས་པར་བྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་སྔགས་སྨྲས་པ། ཏདྱ་ཐཱ། ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་སྭ་ཧཱ། ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཤེས་རབ་ཀྱི་ཕ་རོལ་ཏུ་ ཕྱིན་པ་ཟབ་མོ་ལ་བསླབ་པར་བྱའོ། །དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ཏེ་བྱང་ཆུབ་སེམས་དཔའ་སེམས་ དཔའ་ཆེན་པོས་འཕགས་པ་སྤྱན་རས་དབང་ཕྱུག་ལ་ལེགས་སོ་ཞེས་བྱ་བ་བྱིན་ནས། ལེགས་སོ། །ལེགས་སོ། རིགས་ཀྱི་བུ། དེ་དེ་བཞིན་ཏེ། ཇི་ལྟར་ཁྱོད་ཀྱིས་བསྟན་པ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་ལ་སྤྱད་ པར་བྱ་སྟེ། དེ་བཞིན་གཤེགས་པ་རྣམས་ཀྱང་རྗེས་སུ་ཡི་རང་ངོ་། །བཅོམ་ལྡན་འདས་ཀྱི་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཤཱ་ར་དྭ་ཏིའི་བུ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང་། ཐམས་ཅད་དང་ལྡན་པའི་འཁོར་དེ་དག་དང་། །ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ་རྫོགས་སོ། །

Thirty-five Buddhas of confession - Tung Shak  (Tib. ལྟུང་བཤགས་ ( Tibetan Audio Book )

ལྟུང་བཤགས་བཞུགས་སོ་

ན་མོ་བྱང་ཆུབ་སེམས་དཔའི་ལྟུང་བ་བཤགས་པ། བདག་མིང་འདི་ཞེས་བགྱི་བ། བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་དཔལ་རྒྱལ་བ་ཤཱཀྱ་ཐུབ་པ་ལ་ཕྱག་འཚལ་ལོ། །དེ་བཞིན་གཤེགས་པ་རྡོ་རྗེའི་སྙིང་པོས་རབ་ཏུ་འཇོམས་པ་ལ་ཕྱག་འཚལ་ལོ། །དེ་བཞིན་གཤེགས་པ་རེན་ཆེན་འོད་འཕྲོ་ལ་ཕྱག་འཚལ་ལོ། །དེ་བཞིན་གཤེགས་པ་ཀླུ་དབང་གི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་དཔའ་བོའི་སྡེ་ལ་ཕྱག་འཚལ་ལོ། །དེ་བཞིན་གཤེགས་པ་དཔལ་དགྱེས་ལ་ཕྱག་འཚལ་ལོ། །དེ་བཞིན་གཤེགས་པ་རིན་ཆེན་མེ་ལ་ཕྱག་འཚལ་ལོ། །དེ་བཞིན་གཤེགས་པ་རིན་ཆེན་ཟླ་འོད་ལ་ཕྱག་འཚལ་ལོ། །དེ་བཞིན་གཤེགས་པ་མཐོང་བ་དོན་ཡོད་ལ་ཕྱགས་འཚལ་ལོ། །དེ་བཞིན་གཤེགས་པ་རིན་ཆེན་ཟླ་བ་ལ་ཕྱག་འཚལ་ལོ། །དེ་བཞིན་གཤེགས་པ་དྲི་མ་མེད་པ་ལ་ཕྱག་འཚལ་ལོ། །དེ་བཞིན་གཤེགས་པ་དཔལ་སྦྱིན་ལ་ཕྱག་འཚལ་ལོ། །དེ་བཞིན་གཤེགས་པ་ཚངས་པ་ལ་ཕྱག་འཚལ་ལོ། །དེ་བཞིན་གཤེགས་པ་ཚངས་པས་བྱིན་ལ་ཕྱག་འཚལ་ལོ། །དེ་བཞིན་གཤེགས་པ་ཆུ་ལྷ་ལ་ཕྱག་འཚལ་ལོ། །དེ་བཞིན་གཤེགས་པ་ཆུ་ལྷའི་ལྷ་ལ་ཕྱག་འཚལ་ལོ། །དེ་བཞིན་གཤེགས་པ་དཔལ་བཟང་ལ་ཕྱག་འཚལ་ལོ། །དེ་བཞིན་གཤེགས་པ་ཙན་དན་དཔལ་ལ་ཕྱག་འཚལ་ལོ། །དེ་བཞིན་གཤེགས་པ་གཟི་བརྗིད་མཐའ་ཡས་ལ་ཕྱག་འཚལ་ལོ། །དེ་བཞིན་གཤེགས་པ་འོད་དཔལ་ལ་ཕྱག་འཚལ་ལོ། །དེ་བཞིན་གཤེགས་པ་མྱ་ངན་མེད་པའི་དཔལ་ལ་ཕྱག་འཚལ་ལོ། །དེ་བཞིན་གཤེགས་པ་སྲེད་མེད་ཀྱི་བུ་ལ་ཕྱག་འཚལ་ལོ། །དེ་བཞིན་གཤེགས་པ་མེ་ཏོག་དཔལ་ལ་ཕྱག་འཚལ་ལོ། །དེ་བཞིན་གཤེགས་པ་ཚངས་པའི་འོད་ཟེར་རྣམ་པར་རོལ་པས་མངོན་པར་མཁྱེན་པ་ལ་ཕྱག་འཚལ་ལོ། །དེ་བཞིན་གཤེགས་པ་པདྨའི་འོད་ཟེར་རྣམ་པར་རོལ་པས་མངོན་པར་མཁྱེན་པ་ལ་ཕྱག་འཚལ་ལོ། །དེ་བཞིན་གཤེགས་པ་ནོར་དཔལ་ལ་ཕྱག་འཚལ་ལོ། །དེ་བཞིན་གཤེགས་པ་དྲན་པའི་དཔལ་ལ་ཕྱག་འཚལ་ལོ།།དེ་བཞིན་གཤེགས་པ་མཚན་དཔལ་ཤིན་ཏུ་ཡོངས་གྲགས་ལ་ཕྱག་འཚལ་ལོ། །དེ་བཞིན་གཤེགས་པ་དབང་པོའི་ཏོག་གི་རྒྱལ་མཚན་གྱི་རྒྱལ་པོ་ལ་ཕྱག་འཚལ་ལོ། །དེ་བཞིན་གཤེགས་པ་ཤིན་ཏུ་རྣམ་པར་གནོན་པའི་དཔལ་ལ་ཕྱག་འཚལ་ལོ། །དེ་བཞིན་གཤེགས་པ་གཡུལ་ལས་ཤིན་ཏུ་རྣམ་པར་རྒྱལ་བ་ལ་ཕྱག་འཚལ་ལོ། །དེ་བཞིན་གཤེགས་པ་རྣམ་པར་གནོན་པའི་གཤེགས་པའི་དཔལ་ལ་ཕྱག་འཚལ་ལོ། །  དེ་བཞིན་གཤེགས་པ་ཀུན་ནས་སྣང་བ་བཀོད་པའི་དཔལ་ལ་ཕྱག་འཚལ་ལོ། །དེ་བཞིན་གཤེགས་པ་རིན་ཆེན་པདྨོས་རྣམ་པར་གནོན་པ་ལ་ཕྱག་འཚལ་ལོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་པདྨ་ལ་རབ་ཏུ་བཞུགས་པ་སངས་རྒྱས་རི་དབང་གི་རྒྱལ་པོ་ལ་ཕྱག་འཚལ་ལོ། །དེ་དག་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་གང་ཇི་སྙེད་ཅིག་བཞུགས་ཏེ་འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་ཐམས་ཅད་བདག་ལ་དགོངས་སུ་གསོལ།བདག་གིས་སྐྱེ་བ་འདི་དང་། སྐྱེ་བ་ཐོག་མའི་མཐའ་མ་མཆིས་པ་ནས་འཁོར་བ་ན་འཁོར་བའི་སྐྱེ་གནས་ཐམས་ཅད་དུ་སྡིག་པའི་ལས་བགྱིས་པ་དང་།བགྱིད་དུ་བསྩལ་བ་དང་།བགྱིད་པ་ལ་རྗེས་སུ་ཡི་རང་བའམ། མཆོད་རྟེན་གྱི་དཀོར་རམ།དགེ་འདུན་གྱི་དཀོར་རམ།ཕྱོགས་བཅུའི་དགེ་འདུན་གྱི་དཀོར་འཕྲོགས་པ་དང་།འཕྲོག་ཏུ་བཅུག་པ་དང་། འཕྲོག་པ་ལ་རྗེས་སུ་ཡི་རང་བའམ།  མཚམས་མ་མཆིས་པ་ལྔའི་ལས་བགྱིས་པ་དང་།བགྱིས་དུ་བསྩལ་བ་དང་།བགྱིས་པ་ལ་རྗེས་སུ་ཡི་རང་བའམ། མི་དགེ་བ་བཅུའི་ལས་ཀྱི་ལམ་ཡང་དག་པར་བླང་བ་ལ་ཞུགས་པ་དང་། འཇུག་ཏུ་བསྩལ་བ་དང་།འཇུག་པ་ལ་རྗེས་སུ་ཡི་རང་བའམ། ལས་ཀྱི་སྒྲིབ་པ་གང་གིས་བསྒྲིབས་ནས་བདག་སེམས་ཅན་དམྱལ་བར་མཆི་བའམ། དུད་འགྲོའི་སྐྱེ་གནས་སུ་མཆི་བའམ།ཡི་དགས་ཀྱི་ཡུལ་དུ་མཆི་བའམ། ཡུལ་མཐའ་འཁོར་ཏུ་སྐྱེ་བའམ། ཀླ་ཀློར་སྐྱེ་བའམ། ལྷ་ཚེ་རིང་པོ་རྣམས་སུ་སྐྱེ་བའམ། དབང་པོ་མ་ཚང་བར་འགྱུར་བའམ།ལྟ་བ་ལོག་པར་འཛིན་པར་འགྱུར་བའམ། སངས་རྒྱས་འབྱུང་བ་ལ་མཉེས་པར་མི་བགྱིད་པར་འགྱུར་བའི་ལས་ཀྱི་སྒྲིབ་པ་གང་ལགས་པ་དེ་དག་ཐམས་ཅད་སངས་རྒྱས་བཅོམ་ལྡན་འདས་ཡེ་ཤེས་སུ་གྱུར་པ། སྤྱན་དུ་གྱུར་པ།དཔང་དུ་གྱུར་པ།ཚད་མར་གྱུར་པ། མཁྱེན་པས་གཟིགས་པ་དེ་དག་གི་སྤྱན་སྔར་མཐོལ་ལོ། །འཆགས་སོ། །མི་འཆབ་བོ། །མི་སྦེད་དོ། །སླན་ཆད་ཀྱང་གཅོད་ཅིང་སྡོམ་པར་བགྱིད་ལགས་སོ། །སངས་རྒྱས་བཅོམ་ལྡན་འདས་དེ་དག་ཐམས་ཅད་བདག་ལ་དགོངས་སུ་གསོལ། བདག་གིས་སྐྱེ་བ་འདི་དང་།སྐྱེ་བ་ཐོག་མའི་མཐའ་མ་མ་མཆིས་པ་ནས་་འཁོར་བ་ན་འཁོར་བའི་སྐྱེ་གནས་གཞན་དག་ཏུ་སྦྱིན་པ་ཐ་ན་དུད་འགྲོའི་སྐྱེ་གནས་སུ་སྐྱེས་པ་ལ་ཟས་ཁམ་གཅིག་ཙམ་བསྩལ་བའི་དགེ་བའི་རྩ་བ་གང་ལགས་པ་་དང་། བདག་གིས་ཚུལ་ཁྲིམས་བསྲུངས་པའི་དགེ་བའི་རྩ་བ་གང་ལགས་པ་དང་། བདག་གིས་ཚངས་པར་སྤྱད་པའི་དགི་རྩ་བ་གང་ལགས་པ་དང་། བདག་གི་སེམས་ཅན་ཡོངས་སུ་སྨིན་པར་བགྱིས་པའི་དགེ་རྩ་བ་གང་ལགས་པ་དང་། བདག་གི་བྱང་ཆུབ་མཆོག་ཏུ་སེམས་བསྐྱེད་པའི་དགེ་རྩ་བ་གང་ལགས་པ་དང་། བདག་གི་བླ་ན་མེད་པའི་ཡེ་ཤེས་ཀྱི་དགེ་རྩ་བ་གང་ལགས་པ་དེ་དག་ཐམས་ཅད་གཅིག་ཏུ་བསྡུས་ཤིང་བཟླུམས་ཏེ་བསྡོམས་ནས་བླ་ན་མ་མཆིས་པ་དང་།གོང་ན་མ་མཆིས་པ་དང་།གོང་མའི་ཡང་གོང་མ། བླ་མའི་ཡང་བླ་མར་ཡོངས་སུ་བསྔོ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །ཇི་ལྟར་འདས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོས་བ་དང་། ཇི་ལྟར་མ་བྱོན་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་འགྱུར་བ་དང་། ཇི་ལྟར་ད་ལྟར་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔོ་བར་མཛད་པ་དེ་བཞིན་དུ་བདག་གི་ཀྱང་ཡོངས་སུ་བསྔོ་བར་བགྱིའོ། །སྡིག་པ་ཐམས་ཅད་ནི་སོ་སོར་བཤགས་སོ། །བསོད་ནམས་ཐམས་ཅད་ལ་ནི་རྗེས་སུ་ཡི་རང་ངོ་། །སངས་རྒྱས་ཐམས་ཅད་ལ་ནི་བསྐུལ་ཞིང་གསོལ་བ་འདིབས་སོ། །བདག་གི་བླ་ན་མེད་པའི་ཡེ་ཤེས་ཀྱི་མཆོག་དམ་པ་ཐོབ་པར་གྱུར་ཅིག  །མི་མཆོག་རྒྱལ་བ་གང་དག་ད་ལྟར་བཞུགས་པ་དང་། །གང་དག་འདས་པ་དག་དང་དེ་བཞིན་གང་མ་བྱོན། །ཡོན་ཏན་བསྔགས་པ་མཐའ་ཡས་རྒྱ་མཚོ་འདྲ་ཀུན་ལ། །ཐལ་མོ་སྦྱར་བར་བགྱིས་ཏེ་སྐྱབས་སུ་ཉེ་བར་མཆིའོ། །

    ལུས་ཀྱི་ལས་ནི་རྣམ་པ་གསུམ། །ངག་གི་རྣམ་བཞི་དང་ནི། །གང་ཡང་ཡིད་ཀྱི་རྣམ་གསུམ་པོ། །མི་དགེ་བཅུ་པོ་སོ་སོར་བཤགས། །འདོད་ཆགས་ཞེ་སྡང་གཏི་མུག་དབང་གིས་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང་། །སྡིག་པ་བདག་གིས་བགྱིས་པ་ཅི་མཆིས་པ། །དེ་དག་ཐམས་ཅད་བདག་གིས་སོ་སོར་བཤགས། །ཐོག་མ་མེད་ནས་ད་ལྟའི་བར། །མི་དགེ་བཅུ་དང་མཚམས་མེད་ལྔ།སེམས་ནི་ཉོན་མོངས་དབང་གྱུར་པས། །སྡིག་པ་ཐམས་ཅད་བཤགས་པར་བགྱི། །ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་ཡི། །དགེ་བ་ཅུང་ཟད་བདག་གིས་ཅི་བསགས་པ། །ཐམས་ཅད་རྫོགས་པའི་བྱང་ཆུབ་ཆེན་པོར་བསྔོ། །དགེའོ། །

Praise to the 21 Taras Drolma - Tibetan Audio Book

༈ སྒྲོལ་མ་ཉེར་གཅིག།

༈ ཨོཾ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ༎ ཕྱག་འཚལ་སྒྲོལ་མ་མྱུར་མ་དཔའ་མོ༎ སྤྱན་ནི་སྐད་ཅིག་གློག་དང་འདྲ་མ༎ འཇིག་རྟེན་གསུམ་མགོན་ཆུ་སྐྱེས་ཞལ་གྱི༎ གེ་སར་བྱེ་བ་ལས་ནི་བྱུང་མ༎ཕྱག་འཚལ་སྟོན་ཀའི་ཟླ་བ་ཀུན་ཏུ༎ གང་བ་བརྒྱ་ནི་བརྩེགས་པའི་ཞལ་མ༎ སྐར་མ་སྟོང་ཕྲག་ཚོགས་པ་རྣམས་ཀྱིས༎ རབ་ཏུ་ཕྱེ་བའི་འོད་རབ་འབར་མ༎ ཕྱག་འཚལ་གསེར་སྔོ་ཆུ་ནས་སྐྱེས་ཀྱི༎ པདྨས་ཕྱག་ནི་རྣམ་པར་བརྒྱན་མ༎ སྦྱིན་པ་བརྩོན་འགྲུས་དཀའ་ཐུབ་ཞི་མ༎ བཟོད་པ་བསམ་གཏན་སྤྱོད་ཡུལ་ཉིད་མ༎ཕྱག་འཚལ་དེ་བཞིན་གཤེགས་པའི་གཙུག་ཏོར༎ མཐའ་ཡས་རྣམ་པར་རྒྱལ་བར་སྤྱོད་མ༎ མ་ལུས་ཕ་རོལ་ཕྱིན་པ་ཐོབ་པའི༎ རྒྱལ་བའི་སྲས་ཀྱིས་ཤིན་ཏུ་བསྟེན་མ༎ཕྱག་འཚལ་ཏུཏྟཱ་ར་ཧཱུཾ་ཡི་གེས༎ འདོད་དང་ཕྱོགས་དང་ནམ་མཁའ་གང་མ༎ འཇིག་རྟེན་བདུན་པོ་ཞབས་ཀྱིས་མནན་ཏེ༎ ལུས་པ་མེད་པར་འགུགས་པར་ནུས་མ༎ ཕྱག་འཚལ་བརྒྱ་བྱིན་མེ་ལྷ་ཚངས་པ༎ རླུང་ལ་སྣ་ཚོགས་དབང་ཕྱུག་མཆོད་མ༎འབྱུང་པོ་རོ་ལངས་དྲི་ཟ་རྣམས་དང༌༎ གནོད་སྦྱིན་ཚོགས་ཀྱིས་མདུན་ནས་བསྟོད་མ༎ ཕྱག་འཚལ་ཏྲད་ཅེས་བྱ་དང་ཕཊ་ཀྱིས༎ ཕ་རོལ་འཁྲུལ་འཁོར་རབ་ཏུ་འཇོམས་མ༎ གཡས་བསྐུམས་གཡོན་བརྐྱངས་ཞབས་ཀྱིས་མནན་ཏེ༎ མེ་འབར་འཁྲུགས་པ་ཤིན་ཏུ་འབར་མ༎ཕྱག་འཚལ་ཏུ་རེ་འཇིགས་པ་ཆེན་པོ༎ བདུད་ཀྱི་དཔའ་བོ་རྣམ་པར་འཇོམས་མ༎ ཆུ་སྐྱེས་ཞལ་ནི་ཁྲོ་གཉེར་ལྡན་མཛད༎ དགྲ་བོ་ཐམས་ཅད་མ་ལུས་གསོད་མ༎ ཕྱག་འཚལ་དཀོན་མཆོག་གསུམ་མཚོན་ཕྱག་རྒྱའི༎ སོར་མོས་ཐུགས་ཀར་རྣམ་པར་བརྒྱན་མ༎ མ་ལུས་ཕྱོགས་ཀྱི་འཁོར་ལོས་བརྒྱན་པའི༎ རང་གི་འོད་ཀྱི་ཚོགས་རྣམས་འཁྲུགས་མ༎ཕྱག་འཚལ་རབ་ཏུ་དགའ་བ་བརྗིད་པའི༎ དབུ་རྒྱན་འོད་ཀྱི་ཕྲེང་བ་སྤེལ་མ༎ བཞད་པ་རབ་བཞད་ཏུཏྟཱ་ར་ཡིས༎བདུད་དང་འཇིག་རྟེན་དབང་དུ་མཛད་མ༎ ཕྱག་འཚལ་ས་གཞི་སྐྱོང་བའི་ཚོགས་རྣམས༎ ཐམས་ཅད་འགུགས་པར་ནུས་མ་ཉིད་མ༎ ཁྲོ་གཉེར་གཡོ་བའི་ཡི་གེ་ཧཱུཾ་གིས༎ ཕོངས་པ་ཐམས་ཅད་རྣམ་པར་སྒྲོལ་མ༎ ཕྱག་འཚལ་ཟླ་བའི་དུམ་བུས་དབུ་རྒྱན༎ བརྒྱན་པ་ཐམས་ཅད་ཤིན་ཏུ་འབར་མ༎ རལ་པའི་ཁྲོད་ན་འོད་དཔག་མེད་ལས༎ རྟག་པ་ཤིན་ཏུ་འོད་རབ་མཛད་མ།། ཕྱག་འཚལ་བསྐལ་བའི་ཐ་མའི་མེ་ལྟར༎འབར་བའི་ཕྲེང་བའི་དབུས་ན་གནས་མ༎ གཡས་བརྐྱངས་གཡོན་བསྐུམས་ཀུན་ནས་བསྐོར་དགའི༎ དགྲ་ཡི་དཔུང་ནི་རྣམ་པར་འཇོམས་མ༎ ཕྱག་འཚལ་ས་གཞིའི་ངོས་ལ་ཕྱག་གི༎ མཐིལ་གྱིས་བསྣུན་ཅིང་ཞབས་ཀྱིས་བརྡུང་མ༎ ཁྲོ་གཉེར་སྤྱན་མཛད་ཡི་གེ་ཧཱུཾ་གིས༎ རིམ་པ་བདུན་པོ་རྣམས་ནི་འགེམས་མ༎ཕྱག་འཚལ་བདེ་མ་དགེ་མ་ཞི་མ༎ མྱ་ངན་འདས་ཞི་སྤྱོད་ཡུལ་ཉིད་མ༎ སྭཱཧཱ་ཨོཾ་དང་ཡང་དག་ལྡན་པས༎སྡིག་པ་ཆེན་པོ་འཇོམས་པ་ཉིད་མ༎ ཕྱག་འཚལ་ཀུན་ནས་བསྐོར་རབ་དགའ་བའི༎ དགྲ་ཡི་ལུས་ནི་རྣམ་པར་འགེམས་མ༎ ཡི་གེ་བཅུ་པའི་ངག་ནི་བཀོད་པའི༎ རིག་པ་ཧཱུཾ་ལས་སྒྲོལ་མ་ཉིད་མ༎ ཕྱག་འཚལ་ཏུ་རེ་ཞབས་ནི་བརྟབས་པས༎ ཧཱུཾ་གི་རྣམ་པའི་ས་བོན་ཉིད་མ༎ རི་རབ་མནྡ་ར་དང་འབིགས་བྱེད༎ འཇིག་རྟེན་གསུམ་རྣམས་གཡོ་བ་ཉིད་མ༎ ཕྱག་འཚལ་ལྷ་ཡི་མཚོ་ཡི་རྣམ་པའི༎ རི་དྭགས་རྟགས་ཅན་ཕྱག་ན་བསྣམས་མ༎ ཏཱ་ར་གཉིས་བརྗོད་ཕཊ་ཀྱི་ཡི་གེས༎ དུག་རྣམས་མ་ལུས་པ་ནི་སེལ་མ༎ ཕྱག་འཚལ་ལྷ་ཡི་ཚོགས་རྣམས་རྒྱལ་པོ༎ ལྷ་དང་མིའམ་ཅི་ཡིས་བསྟེན་མ༎ ཀུན་ནས་གོ་ཆ་དགའ་བ་བརྗིད་ཀྱིས༎ རྩོད་དང་རྨི་ལམ་ངན་པ་སེལ་མ༎ ཕྱག་འཚལ་ཉི་མ་ཟླ་བ་རྒྱས་པའི༎ སྤྱན་གཉིས་པོ་ལ་འོད་རབ་གསལ་མ༎ཧ་ར་གཉིས་བརྗོད་ཏུཏྟཱ་ར་ཡིས༎ ཤིན་ཏུ་དྲག་པོའི་རིམས་ནད་སེལ་མ༎ ཕྱག་འཚལ་དེ་ཉིད་གསུམ་རྣམས་བཀོད་པས༎ ཞི་བའི་ཐུ་དང་ཡང་དག་ལྡན་མ༎ གདོན་དང་རོ་ལངས་གནོད་སྦྱིན་ཚོགས་རྣམས༎འཇོམས་པ་ཏུ་རེ་རབ་མཆོག་ཉིད་མ༎ རྩ་བའི་སྔགས་ཀྱིས་བསྟོད་པ་འདི་དང༌༎ ཕྱག་འཚལ་བ་ནི་ཉི་ཤུ་རྩ་གཅིག༎ ༎

The Seven Line Prayer of Maha Guru Rinpoche ( Tibetan Audio Book )

༈ བླ་མ་གསང་འདུས་ལས་གསུངས་པའི་ཁྱད་པར་བླ་སྒྲུབ་ཚིག་བདུན་གསོལ་འདེབས་ནི།

ཐུགས་དམ་ལྷ་ལ་ཕྱག་འཚལ་ལོ༔

ཕྱི་རབས་སྐལ་ལྡན་རིགས་ཀྱི་བུ༔  ཨོ་རྒྱན་བདག་ལ་སྐྱབས་འཚོལ་ན༔  དབེན་པའི་གནས་སུ་རང་འདུག་ནས༔  མི་རྟག་སྐྱོ་བ་སྐྱེ་བ་དང་༔  འཁོར་བས་སུན་པ་རབ་ཏུ་གཅེས༔

བློ་སྙིང་བྲང་གསུམ་ང་ལ་གཏོད༔  གཞན་ཡང་སྐྱབས་གྱུར་རེ་ས་རྣམས༔  ཨོ་རྒྱན་བདག་ལ་རྫོགས་པར་སོམས༔  སྐྱིད་སྡུག་རེ་ལྟོས་ཁྱེད་ཤེས་ཀྱིས༔

མཆོད་བསྟོད་མི་འཚལ་རྒྱུ་གསོག་སྤོངས༔  ལུས་ངག་ཡིད་གསུམ་གུས་པ་ཡིས༔  ཚིག་བདུན་འདི་ཡིས་གསོལ་བ་ཐོབ༔

ཧཱུྃ༔ ཨོ་རྒྱན་ཡུལ་གྱི་ནུབ་བྱང་མཚམས༔

པདྨ་གེ་སར་སྡོང་པོ་ལ༔

ཡ་མཚན་མཆོག་གི་དངོས་གྲུབ་བརྙེས༔

པདྨ་འབྱུང་གནས་ཞེས་སུ་གྲགས༔

འཁོར་དུ་མཁའ་འགྲོ་མང་པོས་བསྐོར༔

ཁྱེད་ཀྱི་རྗེས་སུ་བདག་བསྒྲུབ་ཀྱི༔

བྱིན་གྱིས་བརླབ་ཕྱིར་གཤེགས་སུ་གསོལ༔

གུ་རུ་པདྨ་སིདྡྷི་ཧཱུྃ༔

ཞེས་པས་ཡང་ཡང་གསོལ་བ་ཐོབ༔

གདུང་བ་དྲག་བསྐྱེད་མཆི་མ་ཕྱུང༔ དད་པས་ཁམས་འདུས་འབྱུང་སྲིད་ན༔ ཧག་གིས་ཐོབ་ལ་ས་ལེར་ཞོག༔ སང་ངེ་ཡེ་རེ་མ་ཡེངས་ལྟ༔

འདི་ལྟར་གསོལ་བ་འདེབས་པའི་བུར༔ ང་ཡིས་སྐྱོབ་པ་སྨོས་ཅི་དགོས༔ དུས་གསུམ་རྒྱལ་བའི་སྲས་སུ་འགྱུར༔ དབང་ཆེན་རང་རིག་སེམས་ལ་ཐོབ༔ ཏིང་འཛིན་མཐུ་བརྟན་ཡེ་ཤེས་རྒྱས༔

བྱིན་རླབས་རང་བྱུང་ཆེན་པོ་ཡིས༔ རང་སྨིན་གཞན་སྤྱོད་སྡུག་བསྔལ་སེལ༔ རང་ཉིད་འགྱུར་ཚེ་གཞན་སྣང་རྣམས༔ དུས་མཉམ་འགྱུར་ཞིང་ཕྲིན་ལས་འགྲུབ༔ ཡོན་ཏན་ཐམས་ཅད་རང་ལ་རྫོགས༔

བདག་ཉིད་ཆེན་པོ་ཆོས་ཀྱི་སྐུར༔ སྨིན་ཅིང་གྲོལ་བའི་ཐབས་ཆེན་འདི༔ ཐུགས་ཀྱི་སྲས་དང་འཕྲད་པར་ཤོག༔

ཁྱད་པར་བྱིན་རླབས་ཀྱི་སྒྲུབ་པ་ཚིག་བདུན་མའི་གསོལ་འདེབས་ཤིན་ཏུ་ཟབ་ཕྱིར་ཐུགས་ཀྱི་ཡང་གཏེར་གསང་བར་གདམས་པ༔ ཤེས་རབ་བློ་ལྡན་སྙིང་རྗེ་ཆེ༔ ཆོས་ཀྱི་དབང་ཕྱུག་དེ་དང་འཕྲད་པར་ཤོག༔ ཅེས་སོ།། །།

37 Practices of Bodhisattva - Tibetan Audio Book

རྒྱལ་སྲས་ལག་ལེན་སོ་བདུན་མ་ཞེས་བྱ་བ་བཞུགས་སོ།

།རྒྱལ་སྲས་ཐོགས་མེད་བཟང་པོ། 

༈ ན་མོ་ལོ་ཀེ་ཤྭ་ར་ཡེ། །གང་གིས་ཆོས་ཀུན་འགྲོ་འོང་མེད་གཟིགས་ཀྱང་། །འགྲོ་བའི་དོན་ལ་གཅིག་ཏུ་བརྩོན་མཛད་པ། 

།བླ་མ་མཆོག་དང་སྤྱན་རས་གཟིགས་མགོན་ལ། །རྟག་ཏུ་སྒོ་གསུམ་གུས་པས་ཕྱག་འཚལ་ལོ། 

།ཕན་བདེའི་འབྱུང་གནས་རྫོགས་པའི་སངས་རྒྱས་རྣམས། །དམ་ཆོས་བསྒྲུབས་ལས་བྱུང་སྟེ་དེ་ཡང་ནི། 

།དེ་ཡི་ལག་ལེན་ཤེས་ལ་རག་ལས་པས། །རྒྱལ་སྲས་རྣམས་ཀྱི་ལག་ལེན་བཤད་པར་བྱ། 

༡ དལ་འབྱོར་རྙེད་པར་དཀའ་བ། 

།དལ་འབྱོར་གྲུ་ཆེན་རྙེད་དཀའ་ཐོབ་དུས་འདིར། །བདག་གཞན་འཁོར་བའི་མཚོ་ལས་བསྒྲལ་བྱའི་ཕྱིར། 

།ཉིན་དང་མཚན་དུ་གཡེལ་བ་མེད་པར་ནི། །ཉན་སེམས་བསྒོམ་པ་རྒྱལ་སྲས་ལག་ལེན་ཡིན། 

༢ ཕ་ཡུལ་སྤོང་བ། 

།གཉེན་གྱི་ཕྱོགས་ལ་འདོད་ཆགས་ཆུ་ལྟར་གཡོ། །དགྲ་ཡི་ཕྱོགས་ལ་ཞེ་སྡང་མེ་ལྟར་འབར། 

།བླང་དོར་བརྗེད་པའི་གཏི་མུག་མུན་ནག་ཅན། །ཕ་ཡུལ་སྤོང་བ་རྒྱལ་སྲས་ལག་ལེན་ཡིན། 

༣ དབེན་པ་བསྟེན་པ། 

།ཡུལ་ངན་སྤངས་པས་ཉོན་མོངས་རིམ་གྱིས་འགྲིབ། །རྣམ་གཡེང་མེད་པས་དགེ་སྦྱོར་ངང་གིས་འཕེལ། 

།རིག་པ་དྭངས་པས་ཆོས་ལ་ངེས་ཤེས་སྐྱེ། །དབེན་པ་བསྟེན་པ་རྒྱལ་སྲས་ལག་ལེན་ཡིན། 

༤ མི་རྟག་པ་རྒྱུད་ལ་བསྟེན་པ། 

།ཡུན་རིང་འགྲོགས་པའི་མཛའ་ཤེས་སོ་སོར་འབྲལ། །འབད་པས་བསྒྲུབས་པའི་ནོར་རྫས་བཤུལ་དུ་ལུས། 

།ལུས་ཀྱི་མགྲོན་ཁང་རྣམ་ཤེས་མགྲོན་པོས་བོར། །ཚེ་འདི་བློས་བཏང་རྒྱལ་སྲས་ལག་ལེན་ཡིན། 

༥ གྲོགས་ངན་སྤོང་བ། 

།གང་དང་འགྲོགས་ན་དུག་གསུམ་འཕེལ་འགྱུར་ཞིང་། །ཐོས་བསམ་བསྒོམ་པའི་བྱ་བ་ཉམས་འགྱུར་པ། 

།བྱམས་དང་སྙིང་རྗེ་མེད་པར་སྒྱུར་བྱེད་པའི། །གྲོགས་ངན་སྤོང་བ་རྒྱལ་སྲས་ལག་ལེན་ཡིན། 

༦ གྲོགས་བཟང་བསྟེན་པ། 

།གང་ཞིག་བསྟེན་ན་ཉེས་པ་ཟད་འགྱུར་ཞིང་། །ཡོན་ཏན་ཡར་ངོའི་ཟླ་ལྟར་འཕེལ་འགྱུར་བའི། 

།བཤེས་གཉེན་དམ་པ་རང་གི་ལུས་ལས་ཀྱང་། །གཅེས་པར་འཛིན་པ་རྒྱལ་སྲས་ལག་ལེན་ཡིན། 

༧ སྐྱབས་སུ་འགྲོ་བ། 

།རང་ཡང་འཁོར་བའི་བཙོན་ར་བཅིང་པ་ཡི། །འཇིག་རྟེན་ལྷ་ཡིས་སུ་ཞིག་སྐྱོབ་པར་ནུས། 

།དེ་ཕྱིར་གང་ལ་སྐྱབས་ན་མི་བསླུ་བའི། །དཀོན་མཆོག་སྐྱབས་འགྲོ་རྒྱལ་སྲས་ལག་ལེན་ཡིན། 

༨ སྐྱེས་བུ་ཆུང་ངུའི་ལམ། 

།ཤིན་ཏུ་བཟོད་དཀའི་ངན་སོང་སྡུག་བསྔལ་རྣམས། །སྡིག་པའི་ལས་ཀྱི་འབྲས་བུར་ཐུབ་པས་གསུངས། 

།དེ་ཕྱིར་སྲོག་ལ་བབ་ཀྱང་སྡིག་པའི་ལས། །ནམ་ཡང་མི་བྱེད་རྒྱལ་སྲས་ལག་ལེན་ཡིན། 

༩ སྐྱེས་བུ་འབྲིང་གི་ལམ། 

།སྲིད་གསུམ་བདེ་བ་རྩྭ་རྩེའི་ཟིལ་པ་བཞིན། །ཡུད་ཙམ་ཞིག་གིས་འཇིག་པའི་ཆོས་ཅན་ཡིན། 

།ནམ་ཡང་མི་འགྱུར་ཐར་པའི་གོ་འཕང་མཆོག། །དོན་དུ་གཉེར་བ་རྒྱལ་སྲས་ལག་ལེན་ཡིན། 

༡༠ སྐྱེས་བུ་ཆེན་པོའི་ལམ། 

།ཐོག་མེད་དུས་ནས་བདག་ལ་བརྩེ་བ་ཅན། །མ་རྣམས་སྡུག་ན་རང་བདེས་ཅི་ཞིག་བྱ། 

།དེ་ཕྱིར་མཐའ་ཡས་སེམས་ཅན་བསྒྲལ་བྱའི་ཕྱིར། །བྱང་ཆུབ་སེམས་བསྐྱེད་རྒྱལ་སྲས་ལག་ལེན་ཡིན། 

༡༡ ཀུན་རྫོབ་བྱང་ཆུབ་ཀྱི་སེམས། 

།སྡུག་བསྔལ་མ་ལུས་བདག་བདེ་འདོད་ལས་བྱུང་། །རྫོགས་པའི་སངས་རྒྱས་གཞན་ཕན་སེམས་ལས་འཁྲུངས། 

།དེ་ཕྱིར་བདག་བདེ་གཞན་གྱི་སྡུག་བསྔལ་དག། །ཡང་དག་བརྗེ་བ་རྒྱལ་སྲས་ལག་ལེན་ཡིན། 

༡༢ མི་རྙེད་པ་ལ་བཟོད་པ། 

།སུ་དག་འདོད་ཆེན་དབང་གིས་བདག་གི་ནོར། །ཐམས་ཅད་འཕྲོག་གམ་འཕྲོག་ཏུ་འཇུག་ན་ཡང་། 

།ལུས་དང་ལོངས་སྤྱོད་དུས་གསུམ་དགེ་བ་རྣམས། །དེ་ལ་བསྔོ་བ་རྒྱལ་སྲས་ལག་ལེན་ཡིན། 

༡༣ སྡུག་བསྔལ་དང་ལེན་གྱི་བཟོད་པ། 

།བདག་ལ་ཉེས་པ་ཅུང་ཟད་མེད་བཞིན་དུ། །གང་དག་བདག་གི་མགོ་བོ་གཅོད་བྱེད་ནའང་། 

།སྙིང་རྗེའི་དབང་གིས་དེ་ཡི་སྡིག་པ་རྣམས། །བདག་ལ་ལེན་པ་རྒྱལ་སྲས་ལག་ལེན་ཡིན། 

༡༤ མི་སྙན་པ་ལ་བཟོད་པ། 

།འགའ་ཞིག་བདག་ལ་མི་སྙན་སྣ་ཚོགས་པ། །སྟོང་གསུམ་ཁྱབ་པར་སྒྲོགས་པར་བྱེད་ན་ཡང་། 

།བྱམས་པའི་སེམས་ཀྱིས་སླར་ཡང་དེ་ཉིད་ཀྱི། །ཡོན་ཏན་བརྗོད་པ་རྒྱལ་སྲས་ལག་ལེན་ཡིན། 

༡༥ སྨད་པ་ལ་བཟོད་པ། 

།འགྲོ་མང་འདུས་པའི་དབུས་སུ་འགའ་ཞིག་གིས། །མཚང་ནས་བྲུས་ཤིང་ཚིག་ངན་སྨྲ་ན་ཡང་། 

།དེ་ལ་དགེ་བའི་བཤེས་ཀྱི་འདུ་ཤེས་ཀྱིས། །གུས་པར་འདུད་པ་རྒྱལ་སྲས་ལག་ལེན་ཡིན། 

༡༦ དཀའ་ཚེགས་ལ་བཟོད་པ། 

།བདག་གི་བུ་བཞིན་གཅེས་པར་བསྐྱངས་པའི་མིས། །བདག་ལ་དགྲ་བཞིན་བལྟ་བར་བྱེད་ནའང་། 

།ནད་ཀྱིས་བཏབ་པའི་བུ་ལ་མ་བཞིན་དུ། །ལྷག་པར་བརྩེ་བ་རྒྱལ་སྲས་ལག་ལེན་ཡིན། 

༡༧ བཟོད་པའི་ཁུར་འཁྱེར་བ། 

།རང་དང་མཉམ་པའམ་དམན་པའི་སྐྱེ་བོ་ཡིས། །ང་རྒྱལ་དབང་གིས་བརྙས་ཐབས་བྱེད་ན་ཡང་། 

།བླ་མ་བཞིན་དུ་གུས་པས་བདག་ཉིད་ཀྱི། །སྤྱི་བོར་ལེན་པ་རྒྱལ་སྲས་ལག་ལེན་ཡིན། 

༡༨ སྡུག་བསྔལ་ལམ་བྱེད། 

།འཚོ་བས་ཕོངས་ཤིང་རྟག་ཏུ་མི་ཡིས་བརྙས། །ཚབས་ཆེན་ནད་དང་གདོན་གྱིས་བཏབ་ཀྱང་སླར། 

།འགྲོ་ཀུན་སྡིག་སྡུག་བདག་ལ་ལེན་བྱེད་ཅིང་། །ཞུམ་པ་མེད་པ་རྒྱལ་སྲས་ལག་ལེན་ཡིན། 

༡༩ འབྱོར་རྒུད་ལ་བཟོད་པ། 

།སྙན་པར་གྲགས་ཤིང་འགྲོ་མང་སྤྱི་བོས་བཏུད། །རྣམ་ཐོས་བུ་ཡི་ནོར་འདྲ་ཐོབ་གྱུར་ཀྱང་། 

།སྲིད་པའི་དཔལ་འབྱོར་སྙིང་པོ་མེད་གཟིགས་ནས། །ཁེངས་པ་མེད་པ་རྒྱལ་སྲས་ལག་ལེན་ཡིན། 

༢༠ བྱམས་པ་དང་སྙིང་རྗེ་ལ་བསླབ་པ། 

།རང་གི་ཞེ་སྡང་དགྲ་བོ་མ་ཐུལ་ན། །ཕྱི་རོལ་དགྲ་བོ་བཏུལ་ཞིང་འཕེལ་བར་འགྱུར། 

།དེ་ཕྱིར་བྱམས་དང་སྙིང་རྗེའི་དམག་དཔུང་གིས། །རང་རྒྱུད་འདུལ་བ་རྒྱལ་སྲས་ལག་ལེན་ཡིན། 

༢༡ འདོད་པའི་ལོངས་སྤྱོད་ལ་ཞེན་པ་སྤོང་བ། 

།འདོད་པའི་ཡོན་ཏན་ལན་ཚྭའི་ཆུ་དང་འདྲ། །ཇི་ཙམ་སྤྱད་ཀྱང་སྲེད་པ་འཕེལ་བར་འགྱུར། 

།གང་ལ་ཞེན་ཆགས་སྐྱེ་བའི་དངོས་པོ་རྣམས། །འཕྲལ་ལ་སྤོང་བ་རྒྱལ་སྲས་ལག་ལེན་ཡིན། 

༢༢ སྤྱིར་གཟུང་འཛིན་གཉིས་སུ་མ་གྲུབ་པ། 

།ཇི་ལྟར་སྣང་བ་འདི་དག་རང་གི་སེམས། །སེམས་ཉིད་གདོད་ནས་སྤྲོས་པའི་མཐའ་དང་བྲལ། 

།དེ་ཉིད་ཤེས་ནས་གཟུང་འཛིན་མཚན་མ་རྣམས། །ཡིད་ལ་མི་བྱེད་རྒྱལ་སྲས་ལག་ལེན་ཡིན། 

༢༣ བདེ་བར་སྣང་བའི་ཡུལ་གཟུང་འཛིན་མ་གྲུབ་པ། 

།ཡིད་དུ་འོང་བའི་ཡུལ་དང་འཕྲད་པ་ན། །དབྱར་གྱི་དུས་ཀྱི་འཇའ་ཚོན་ཇི་བཞིན་དུ། 

།མཛེས་པར་སྣང་ཡང་བདེན་པར་མི་ལྟ་ཞིང་། །ཞེན་ཆགས་སྤོང་བ་རྒྱལ་སྲས་ལག་ལེན་ཡིན། 

༢༤ སྡུག་བསྔལ་ལྟར་སྣང་བའི་གཟུང་འཛིན་མ་གྲུབ་པ། 

།སྡུག་བསྔལ་སྣ་ཚོགས་རྨི་ལམ་བུ་ཤི་ལྟར། །འཁྲུལ་སྣང་བདེན་པར་བཟུང་བས་ཨ་ཐང་ཆད། 

།དེ་ཕྱིར་མི་མཐུན་རྐྱེན་དང་འཕྲད་པའི་ཚེ། །འཁྲུལ་པར་ལྟ་བ་རྒྱལ་སྲས་ལག་ལེན་ཡིན། 

༢༥ སྦྱིན་པའི་ཕར་ཕྱིན། 

།བྱང་ཆུབ་འདོད་པས་ལུས་ཀྱང་གཏོང་དགོས་ན། །ཕྱི་རོལ་དངོས་པོ་རྣམས་ལ་སྨོས་ཅི་དགོས། 

།དེ་ཕྱིར་ལན་དང་རྣམ་སྨིན་མི་རེ་བའི། །སྦྱིན་པ་གཏོང་བ་རྒྱལ་སྲས་ལག་ལེན་ཡིན། 

༢༦ ཚུལ་ཁྲིམས་ཀྱི་ཕར་ཕྱིན། 

།ཚུལ་ཁྲིམས་མེད་པར་རང་དོན་མི་འགྲུབ་ན། །གཞན་དོན་བསྒྲུབ་པར་འདོད་པ་གད་མོའི་གནས། 

།དེ་ཕྱིར་སྲིད་པའི་འདུན་པ་མེད་པ་ཡིས། །ཚུལ་ཁྲིམས་བསྲུང་བ་རྒྱལ་སྲས་ལག་ལེན་ཡིན། 

༢༧ བཟོད་པའི་ཕར་ཕྱིན། 

།དགེ་བའི་ལོངས་སྤྱོད་འདོད་པའི་རྒྱལ་སྲས་ལ། །གནོད་བྱེད་ཐམས་ཅད་རིན་ཆེན་གཏེར་དང་མཚུངས། 

།དེ་ཕྱིར་ཀུན་ལ་ཞེ་འགྲས་མེད་པ་ཡི། །བཟོད་པ་སྒོམ་པ་རྒྱལ་སྲས་ལག་ལེན་ཡིན། 

༢༨ བརྩོན་འགྲུས་ཀྱི་ཕར་ཕྱིན། 

།རང་དོན་འབའ་ཞིག་བསྒྲུབ་པའི་ཉན་རང་ཡང་། །མགོ་ལ་མེ་ཤོར་བཟློག་ལྟར་བརྩོན་མཐོང་ན། 

།འགྲོ་ཀུན་དོན་དུ་ཡོན་ཏན་འབྱུང་གནས་ཀྱི། །བརྩོན་འགྲུས་རྩོམ་པ་རྒྱལ་སྲས་ལག་ལེན་ཡིན། 

༢༩ བསམ་གཏན་གྱི་ཕར་ཕྱིན། 

།ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱས་ནས། 

།གཟུགས་མེད་བཞི་ལས་ཡང་དག་འདས་པ་ཡི། བསམ་གཏན་སྒོམ་པ་རྒྱལ་སྲས་ལག་ལེན་ཡིན། 

༣༠ ཤེས་རབ་ཀྱི་ཕར་ཕྱིན། 

།ཤེས་རབ་མེད་ན་ཕ་རོལ་ཕྱིན་ལྔ་ཡིས། །རྫོགས་པའི་བྱང་ཆུབ་ཐོབ་པར་མི་ནུས་པས། 

།ཐབས་དང་ལྡན་ཞིང་འཁོར་གསུམ་མི་རྟོག་པའི། །ཤེས་རབ་སྒོམ་པ་རྒྱལ་སྲས་ལག་ལེན་ཡིན། 

༣༡ རང་གི་སྒོ་གསུམ་ལ་བརྟག་པ། 

།རང་གི་འཁྲུལ་པ་རང་གིས་མ་བརྟགས་ན། །ཆོས་པའི་གཟུགས་ཀྱིས་ཆོས་མིན་བྱེད་སྲིད་པས། 

།དེ་ཕྱིར་རྒྱུན་དུ་རང་གི་འཁྲུལ་པ་ལ། །བརྟགས་ནས་སྤོང་བ་རྒྱལ་སྲས་ལག་ལེན་ཡིན། 

༣༢ གཞན་གྱི་ཉེས་པ་མི་སྨྲ་བ། 

།ཉོན་མོངས་དབང་གིས་རྒྱལ་སྲས་གཞན་དག་གི། །ཉེས་པ་གླེང་ན་བདག་ཉིད་ཉམས་འགྱུར་བས། 

།ཐེག་པ་ཆེ་ལ་ཞུགས་པའི་གང་ཟག་གི། །ཉེས་པ་མི་སྨྲ་རྒྱལ་སྲས་ལག་ལེན་ཡིན། 

༣༣ རྩོད་པའི་གཞི་རྙེད་བཀུར་ལ་མི་ཆགས་པ། 

།རྙེད་བཀུར་དབང་གིས་ཕན་ཚུན་རྩོད་འགྱུར་ཞིང་། །ཐོས་བསམ་སྒོམ་པའི་བྱ་བ་ཉམས་འགྱུར་བས། 

།མཛའ་བཤེས་ཁྱིམ་དང་སྦྱིན་བདག་ཁྱིམ་རྣམས་ལ། །ཆགས་པ་སྤོང་བ་རྒྱལ་སྲས་ལག་ལེན་ཡིན། 

༣༤ ཚིག་རྩུབ་སྤོང་བར་གདམས་པ། 

།རྩུབ་མོའི་ཚིག་གིས་གཞན་སེམས་འཁྲུག་འགྱུར་ཞིང་། །རྒྱལ་བའི་སྲས་ཀྱི་སྤྱོད་ཚུལ་ཉམས་འགྱུར་བས། 

།དེ་ཕྱིར་གཞན་གྱི་ཡིད་དུ་མི་འོང་བའི། །ཚིག་རྩུབ་སྤོང་བ་རྒྱལ་སྲས་ལག་ལེན་ཡིན། 

༣༥ ཉོན་མོངས་པའི་གཉེན་པོ་བསྟན་པ། 

།ཉོན་མོངས་གོམས་ན་གཉེན་པོས་བཟློག་དཀའ་བས། །དྲན་ཤེས་སྐྱེས་བུས་གཉེན་པོའི་མཚོན་བཟུང་ནས། 

།ཆགས་སོགས་ཉོན་མོངས་དང་པོ་སྐྱེས་མ་ཐག། །འབུར་འཇོམས་བྱེད་པ་རྒྱལ་སྲས་ལག་ལེན་ཡིན། 

༣༦ དྲན་ཤེས་བཞིན་ལ་བསླབ་པ། 

།མདོར་ན་གང་དུ་སྤྱོད་ལམ་ཅི་བྱེད་ཀྱང་། །རང་གི་སེམས་ཀྱི་གནས་སྐབས་ཅི་འདྲ་ཞེས། 

།རྒྱུན་དུ་དྲན་དང་ཤེས་བཞིན་ལྡན་པ་ཡིས། །གཞན་དོན་སྒྲུབ་པ་རྒྱལ་སྲས་ལག་ལེན་ཡིན། 

༣༧ དགེ་བའི་རྩ་བ་བྱང་ཆུབ་ཏུ་བསྔོ་བ། 

།དེ་ལྟར་བརྩོན་པས་བསྒྲུབ་པའི་དགེ་བ་རྣམས། །མཐའ་ཡས་འགྲོ་བའི་སྡུག་བསྔལ་བསལ་བའི་ཕྱིར། 

།འཁོར་གསུམ་རྣམ་པར་དག་པའི་ཤེས་རབ་ཀྱིས། །བྱང་ཆུབ་བསྔོ་བ་རྒྱལ་སྲས་ལག་ལེན་ཡིན། 

།མདོ་རྒྱུད་བསྟན་བཅོས་རྣམས་ལས་གསུངས་པའི་དོན། །དམ་པ་རྣམས་ཀྱི་གསུང་གི་རྗེས་འབྲང་ནས། 

།རྒྱལ་སྲས་རྣམས་ཀྱི་ལག་ལེན་སུམ་ཅུ་བདུན། །རྒྱལ་སྲས་ལམ་ལ་སློབ་འདོད་དོན་དུ་བཀོད། 

།བློ་གྲོས་དམན་ཞིང་སྦྱང་པ་ཆུང་བའི་ཕྱིར། །མཁས་པ་དགྱེས་པའི་སྡེབ་སྦྱོར་མ་མཆིས་ཏེ། 

།མདོ་དང་དམ་པའི་གསུང་ལ་བརྟེན་པའི་ཕྱིར། །རྒྱལ་སྲས་ལག་ལེན་འཁྲུལ་མེད་ལགས་པར་སེམས། 

།འོན་ཀྱང་རྒྱལ་སྲས་སྤྱོད་པ་རླབས་ཆེན་རྣམས། །བློ་དམན་བདག་འདྲ་གཏིང་དཔག་དཀའ་བའི་ཕྱིར། 

།འགལ་དང་མ་འབྲེལ་ལ་སོགས་ཉེས་པའི་ཚོགས། །དམ་པ་རྣམས་ཀྱིས་བཟོད་པར་མཛད་དུ་གསོལ། 

།དེ་ལས་བྱུང་བའི་དགེ་བས་འགྲོ་བ་ཀུན། །དོན་དམ་ཀུན་རྫོབ་བྱང་ཆུབ་སེམས་མཆོག་གིས། 

།སྲིད་དང་ཞི་བའི་མཐའ་ལ་མི་གནས་པའི། །སྤྱན་རས་གཟིགས་མགོན་དེ་དང་མཚུངས་པར་ཤོག། 

 

Hundred Verses Advice Padampa Sangye (Tibetan Audio Book)

༄༅།།ཕ་དམ་པ་སངས་རྒྱས་ཀྱི་ཞལ་གདམས་དིང་རི་བརྒྱ་རྩ་མ་ཞེས་བྱ་བ་བཞུགས་སོ། །

    ༄༅། །ཨོཾ་སྭ་སྟི། །ལུས་ངག་ཡིད་གསུམ་དམ་པའི་ཆོས་ལ་འབུངས། །ལས་ཀྱིས་རབ་ཏུ་འགྱུར་རོ་དིང་རི་བ། །བློ་སྙིང་བྲང་གསུམ་དཀོན་མཆོག་གསུམ་ལ་གཏོད། །བྱིན་རླབས་ཤུགས་ཀྱིས་འབྱུང་ངོ་དིང་རི་བ། །ཚེ་འདི་ཐོངས་ལ་ཕྱི་མའི་དོན་གཉེར་བསྐྱེད། །མདུན་མའི་རྩེ་མོར་འགྱུར་རོ་དིང་རི་བ། །བཟའ་ཚོ་མི་རྟག་ཚོང་འདུས་མགྲོན་པོ་འདྲ། །ངན་གཤགས་འཐབ་མོ་མ་བྱེད་དིང་རི་བ། །ནོར་རྫས་སྒྱུ་མ་ལྟ་བུའི་གཡར་པོ་ལ། །སེར་སྣའི་མདུད་པས་མ་ཆིངས་དིང་རི་བ། །ཕུང་པོ་མི་གཙང་ཟས་ཀྱི་རྐྱལ་བ་ལ། །བཟང་འདོད་བྱི་དོར་མ་བྱེད་དིང་རི་བ། །གཉེན་ཚན་སྒྱུ་མ་ལྟ་བུའི་བསླུ་བྲིད་ལ། །གདུང་སེམས་འཁྲི་བ་ཆོད་ཅིག་དིང་རི་བ། །ཡུལ་གཞིས་འབྲོག་པའི་སྦྲ་ས་ལྟ་བུ་ལ། །ཞེན་ཅིང་ཆགས་པ་མ་བྱེད་དིང་རི་བ། །ཕ་ཡུལ་རིགས་དྲུག་སེམས་ཅན་སྤྱི་མཐུན་ལ། །ང་དང་བདག་ཏུ་མ་འཛིན་དིང་རི་བ། །སྐྱེས་པའི་ནང་པར་འཆི་བའི་བརྡ་ཞིག་བྱུང༌། །ལོང་མེད་རྒྱུད་ལ་ཁོལ་ཞིག་དིང་རི་བ། །གཡེང་བ་མེད་པ་དམ་པའི་ཆོས་ལ་འབུངས། །ཤི་ནས་ལམ་སྣ་འདྲེན་ནོ་དིང་རི་བ། །ལས་ཀྱི་རྣམ་སྨིན་རྒྱུ་འབྲས་བདེན་ངེས་པ། །མི་དགེ་སྡིག་ལ་འཛེམ་ཞིག་དིང་རི་བ། །བྱས་པའི་ཆོས་རྣམས་རྨི་ལམ་ཡུལ་བཞིན་འདྲ། །བྱར་མེད་ཉམས་སུ་ལོངས་ཤིག་དིང་རི་བ། །གང་ལ་ཞེན་པ་ཡོད་པ་དེ་བློས་ཐོངས། །ཅིས་ཀྱང་དགོས་པ་མེད་དོ་དིང་རི་བ། །འཇིག་རྟེན་འདི་ན་གཏན་དུ་མི་སྡོད་པས། །འགྲོ་ཆས་ད་ལྟ་གྱིས་ཤིག་དིང་རི་བ། །ནགས་ཀྱི་གསེབ་ན་སྤྲེའུ་སྐྱིད་སྙམ་སྟེ། །ནགས་མཐའ་མེ་ཡིས་བསྐོར་རོ་དིང་རི་བ། །སྐྱེ་རྒ་ན་འཆིའི་ཆུ་ལ་རབས་ཟམ་མེད། །གྲུ་ཟིང་ད་ལྟ་ཚུགས་ཤིག་དིང་རི་བ། །སྐྱེ་འཆི་བར་དོའི་རྐུན་འཕྲང་དམ་པོ་ལ། །དུག་ལྔའི་ཇག་པ་བཤར་རྒྱུག་ཡང་ཡང་བྱེད། །སྐྱེལ་མར་བླ་མ་ཚོལ་ཞིག་དིང་རི་བ། །འཇུས་ནས་འགྱེལ་དོགས་མེད་པ་བླ་མ་ཡིན། །འབྲལ་མེད་གཙུག་ཏུ་ཁུར་ཞིག་དིང་རི་བ། །བླ་མས་བསྐྱལ་ན་གང་འདོད་གནས་སུ་སླེབས།།གང་ལ་མོས་གུས་གྱིས་ཤིག་དིང་རི་བ། །གང་ལ་ནོར་ཡོད་དེ་ལ་སེར་སྣ་འབྱུང༌། །སྦྱིན་པ་ཕྱོགས་མེད་ཐོངས་ཤིག་དིང་རི་བ། །གང་ལ་དབང་ཡོད་དེ་ལ་སྡིག་པ་ཡོད། །ཁ་དྲག་དབང་འདོད་སྤོངས་ཤིག་དིང་རི་བ། །ཁ་དྲག་ནོར་མང་ཅན་ལ་བདེ་བ་མེད། །སོར་བཅུ་བྲང་ལ་ཁྲོམས་ཤིག་དིང་རི་བ། །ཕྱི་མའི་ཡུལ་ན་གཉེན་བཤེས་ཉུང་བ་ཡིན། །བློ་གཏད་ཆོས་ལ་གྱིས་ཤིག་དིང་རི་བ། །ཡེངས་མ་ལམ་ལ་མདུན་མ་འཆལ་མར་འཆོར། །གྲོས་ཐག་ད་ལྟ་ཆོད་ཅིག་དིང་རི་བ། །འཆི་བདག་བདུད་ནི་ནམ་ཡོང་ཚོད་མེད་པས། །དོགས་ཟོན་འཕྲལ་ལ་གྱིས་ཤིག་དིང་རི་བ། །ཤི་བའི་ནང་པར་སུས་ཀྱང་མི་ཕན་པས། །རང་མགོ་རང་གིས་ཐོན་ཞིག་དིང་རི་བ། །འཆི་བར་བསམ་ན་ཅིས་ཀྱང་དགོས་པ་མེད། །ཡིད་ལ་དྲན་པར་གྱིས་ཤིག་དིང་རི་བ། །ཉི་མ་ནུབ་ཁའི་གྲིབ་སོ་ཇི་བཞིན་དུ། །འཆི་བདག་གཤིན་རྗེ་མི་སྡོད་ཚུར་ཚུར་འོང༌། །འབྲོས་ཐབས་ལ་འུར་གྱིས་ཤིག་དིང་རི་བ། །མེ་ཏོག་སྔ་སོ་ལེགས་ཀྱང་ཕྱི་སོ་སྐམ། །ལུས་ལ་བློ་གཏད་མེད་དོ་དིང་རི་བ། །གསོན་པའི་དུས་ན་ལྷ་ཡི་ལུས་དང་འདྲ། །ཤི་བའི་དུས་ན་བདུད་ཀྱི་དམག་བས་འཇིགས། །སྒྱུ་མའི་ལུས་འདིས་བསླུའོ་དིང་རི་བ། །ཚོང་དུས་མགྲོན་པོ་ཚོང་ཟིན་ནང་པར་གྱེས། །གྲོགས་ཀྱིས་བོར་བར་ངེས་སོ་དིང་རི་བ། །སྒྱུ་མའི་ཐོ་ཡོར་ཅིས་ཀྱང་འགྱེལ་ངེས་པས། །རྟེན་འབྲེལ་ད་ལྟ་སྒྲིགས་ཤིག་དིང་རི་བ། །སེམས་ཀྱི་བྱ་རྒོད་ཅིས་ཀྱང་འཕུར་ངེས་པས། །ནམ་འཕང་ད་ལྟ་ཆོད་ཅིག་དིང་རི་བ། །རིགས་དྲུག་སེམས་ཅན་དྲིན་ཆེན་ཕ་མ་ལ། །བྱམས་དང་སྙིང་རྗེ་སྒོམས་ཤིག་དིང་རི་བ། །སྡང་དགྲ་ལས་ཀྱི་འཁོར་བའི་འཁྲུལ་སྣང་ལ། །ཞེ་སྡང་གདུག་སེམས་སྤོངས་ཤིག་དིང་རི་བ། །ཕྱག་འཚལ་བསྐོར་བས་ལུས་ཀྱི་སྡིག་པ་འདག །འཇིག་རྟེན་བྱ་བྱེད་སྤོངས་ཤིག་དིང་རི་བ། །བཟླས་བརྗོད་སྐྱབས་འགྲོས་ངག་གི་སྡིག་པ་འདག །ཐ་མལ་ལོང་གཏམ་མ་ལབ་དིང་རི་བ། །མོས་གུས་གདུང་བས་ཡིད་ཀྱི་སྡིག་པ་འདག །བླ་མ་སྤྱི་བོར་འཁུར་ཞིག་དིང་རི་བ། །ལྷན་ཅིག་སྐྱེས་པའི་ཤ་དང་རུས་པ་ཕྲལ། །ཚེ་ལ་རྟག་པར་མ་འཛིན་དིང་རི་བ། །ཡུལ་གྱི་དམ་པར་གཉུག་མའི་གཏན་ཡུལ་ཟུངས། །དེ་ལ་འཕོ་འཕྱུག་མེད་དོ་དིང་རི་བ། །ནོར་གྱི་དམ་པར་སེམས་ཉིད་གཏེར་ཆེན་ཆོངས། །དེ་ལ་འཛད་པ་མེད་དོ་དིང་རི་བ། ། ཟས་ཀྱི་དམ་པར་ཏིང་འཛིན་རོ་མཆོག་སྤྱོད། །བཀྲེས་པའི་སྡུག་བསྔལ་མེད་དོ་དིང་རི་བ། །སྐོམ་གྱི་དམ་པར་དྲན་པའི་བདུད་རྩི་འཐུངས། །དེ་ལ་རྒྱུན་ཆད་མེད་དོ་དིང་རི་བ། །གྲོགས་ཀྱི་དམ་པར་རང་བྱུང་ཡེ་ཤེས་འཚོལ། །དེ་ལ་འདུ་འབྲལ་མེད་དོ་དིང་རི་བ། །སྲས་ཀྱི་དམ་པར་རིག་པའི་ཁྱེའུ་ཆུང་འཚོལ། །དེ་ལ་སྐྱེ་འཆི་མེད་དོ་དིང་རི་བ། །སྟོང་པའི་ངང་དུ་རིག་པའི་མདུང་སྐོར་གྱིས། །ལྟ་བར་ཐོགས་ཐུག་མེད་དོ་དིང་རི་བ། །དྲན་མེད་སྟེང་དུ་ཡེངས་མེད་བྱ་ར་ཐོངས། །སྒོམ་ལ་བྱིང་རྒོད་མེད་དོ་དིང་རི་བ། །ཤུགས་འབྱུང་ངང་དུ་འགག་མེད་རྩལ་སྦྱོང་གྱིས། །སྤྱོད་པར་སྤང་བླང་མེད་དོ་དིང་རི་བ། །སྐུ་བཞི་དབྱེར་མེད་རང་རིག་སེམས་ལ་འཚོལ། །འབྲས་བུར་རེ་དོགས་མེད་དོ་དིང་རི་བ། །འཁོར་འདས་རྩ་བ་རིག་པའི་སེམས་ལ་འདུས། །སེམས་ལ་དངོས་པོ་མེད་དོ་དིང་རི་བ། །ཆགས་སྡང་སྣང་བ་བྱ་ལམ་རྗེས་མེད་འདྲ། །ཉམས་ལ་ཞེན་པ་མེད་དོ་དིང་རི་བ། །ཆོས་སྐུ་སྐྱེ་མེད་ཉི་མའི་སྙིང་པོ་འདྲ། །འོད་ལ་གསལ་འགྲིབ་མེད་དོ་དིང་རི་བ། །རྣམ་རྟོག་དགྲར་ལང་ཁང་སྟོང་རྐུན་མ་འདྲ། །ནོར་ལ་ཤོར་ཐོབ་མེད་དོ་དིང་རི་བ། །ཚོར་བ་རྗེས་མེད་ཆུ་ཡི་རི་མོ་འདྲ། །འཁྲུལ་སྣང་རྗེས་འཛིན་མེད་དོ་དིང་རི་བ།།བག་ཆགས་དྲན་འཛིན་ནམ་མཁའི་འཇའ་རིས་འདྲ། །ཞེན་ཆགས་ངོས་བཟུང་མེད་དོ་དིང་བ། །འགྱུ་བ་དྭངས་པ་སྤྲིན་བྲལ་ཉི་མ་འདྲ། །སེམས་ལ་བློ་གཏད་མེད་དོ་དིང་རི་བ། །འཛིན་མེད་རང་གྲོལ་སྐྱི་སེར་རླུང་དང་འདྲ། །ཡུལ་ལ་ཞེན་འཛིན་མེད་དོ་དིང་རི་བ། །རིག་པ་དངོས་མེད་ནམ་མཁའི་འཇའ་དང་འདྲ། །ཉམས་ལ་ཐོགས་ཐུག་མེད་དོ་དིང་རི་བ། །ཆོས་ཉིད་དོན་མཐོང་ལྐུག་པའི་རྨི་ལམ་འདྲ། །ཚིག་དང་ཐ་སྙད་བྲལ་ལོ་དིང་རི་བ། །རྟོགས་པའི་ཉམས་ཤར་གཞོན་ནུའི་བདེ་བ་འདྲ། །དགའ་བདེ་བརྗོད་དུ་མེད་དོ་དིང་རི་བ། །གསལ་སྟོང་དབྱེར་མེད་ཆུ་ནང་ཟླ་བ་འདྲ། །གང་ལའང་ཆགས་ཐོགས་མེད་དོ་དིང་རི་བ། །སྣང་སྟོང་དབྱེར་མེད་ནམ་མཁའ་སྟོང་པ་འདྲ། །སེམས་ལ་མཐའ་དབུས་མེད་དོ་དིང་རི་བ། །དྲན་པ་ཡེངས་མེད་སྒེག་མོའི་མེ་ལོང་འདྲ། །དེ་ལ་གྲུབ་མཐའ་མེད་དོ་དིང་རི་བ། །རིག་སྟོང་དབྱེར་མེད་མེ་ལོང་གཟུགས་བརྙན་འདྲ། །དེ་ལ་སྐྱེ་འགག་མེད་དོ་དིང་རི་བ།།བདེ་སྟོང་འཛིན་མེད་གངས་ལ་ཉི་ཤར་འདྲ། །དེ་ལ་ངོས་བཟུང་མེད་དོ་དིང་རི་བ། །འཁྲུལ་གཏམ་རྗེས་མེད་བྲག་ཆ་ལྷ་མོ་འདྲ། །སྒྲ་ལ་འཛིན་པ་མེད་དོ་དིང་རི་བ། །བདེ་སྡུག་འཁྲུལ་འཁོར་པི་ཝང་ཁོང་རྒྱུན་འདྲ། །རྒྱུ་རྐྱེན་ལས་ལ་སྦྱོར་རོ་དིང་རི་བ། །འཁོར་འདས་རང་གྲོལ་བྱིས་པའི་རྩེད་མོ་འདྲ། །སེམས་ལ་སྐྱེ་འགག་མེད་དོ་དིང་རི་བ། །ཕྱི་ནང་སྤྲོས་པ་རང་གི་སེམས་ལ་བསྡུས། །འཁྱག་རོམ་ཆུ་རུ་ཞུའོ་དིང་རི་བ། །མ་རིག་འཁྲུལ་འཁོར་སྤང་ལ་ཆུ་རྡོལ་འདྲ། །བཀག་པས་ཁེག་པ་མེད་དོ་དིང་རི་བ། །འཁོར་འདས་འཁྲུལ་སྣང་སྒྲ་བཟུང་བྲལ་བ་འདྲ། །ར་མདའ་བླ་མ་ལྷག་གོ་དིང་རི་བ། །སྐུ་ལྔ་རང་གསལ་གསེར་གླིང་བལྟས་པ་དང༌། །རེ་དོགས་སྤང་བླང་མེད་དོ་དིང་རི་བ། །དལ་འབྱོར་མི་ལུས་རིན་ཆེན་གསེར་དང་འདྲ། །དོན་མེད་ཆུད་ཟོས་མ་བྱེད་དིང་རི་བ། །ཐེག་ཆེན་ཆོས་ཚུལ་ཡིད་བཞིན་ནོར་བུ་འདྲ། །བཙལ་ཡང་རྙེད་པར་དཀའ་འོ་དིང་རི་བ། །ཚེ་འདིའི་ལྟོ་གོས་ཇི་ལྟར་བྱས་ཀྱང་ཕྱིད། །འདོད་དོན་ཆོས་ལ་སྒྲིལ་ཤིག་དིང་རི་བ། །གཞོན་ནུའི་དུས་སུ་དཀའ་ཐུབ་ཉམས་ལེན་གྱིས། །རྒས་ནས་འབྱུང་བས་མི་འཆུན་དིང་རི་བ། །ཉོན་མོངས་སྐྱེ་དུས་གཉེན་པོས་སླེབས་པར་གྱིས། །མཚན་མ་རང་སར་གྲོལ་ལོ་དིང་རི་བ། །སྐབས་སུ་འཁོར་བའི་སྡུག་བསྔལ་དྲན་པར་གྱིས། །དད་པའི་གསོལ་འདེབས་ཡིན་ནོ་དིང་རི་བ། །ད་རེས་བརྩོན་འགྲུས་བསྐྱེད་ལ་རང་ས་ཟུངས། །ཤི་ནས་གར་སྐྱེ་མེད་དོ་དིང་རི་བ། །ཚེ་ལ་ལོང་མེད་རྩ་ཁའི་ཟིལ་པ་འདྲ། །ལེ་ལོ་སྙོམ་ལས་སྤོངས་ཤིག་དིང་རི་བ། །སངས་རྒྱས་བསྟན་པ་སྤྲིན་བར་ཉི་མ་འདྲ། །ད་རེས་གསལ་བ་ཡིན་ནོ་དིང་རི་བ། །སྐྱིད་སྡུག་གཉིས་ཀྱི་ལེ་ལན་གཞན་སེམས་ཀྱང༌། །རྐྱེན་རྩ་རང་ལ་ཡོད་དོ་དིང་རི་བ། །དད་པའི་རྐྱེན་གྱིས་བསྐུལ་བའི་ལམ་ཉེ་བས། །འཁོར་བའི་ཉེས་དམིགས་སོམས་ཤིག་དིང་རི་བ། །གྲོགས་ངན་བསྟེན་ན་སྤྱོད་ངན་ཤུགས་ལ་འགོ །སྡིག་པའི་གྲོགས་པོ་སྤོངས་ཤིག་དིང་རི་བ། །གྲོགས་བཟང་བསྟེན་ན་ཡོན་ཏན་ཤུགས་ལ་འབྱུང༌། །དགེ་བའི་བཤེས་གཉེན་བསྟེན་ཞིག་དིང་རི་བ། །གཡོ་སྒྱུ་རྫུན་གྱིས་རང་དང་གཞན་ཡང་བསླུ། །དཔང་པོར་སེམས་ལ་ཆོལ་ཞིག་དིང་རི་བ། །མ་རིག་འཁྲུལ་པ་ཕུང་འདྲེའི་རྩ་བ་ཡིན། །ཤེས་བཞིན་དྲན་པས་ཟུངས་ཤིག་དིང་རི་བ། །དུག་ལྔ་དུག་གསུམ་གཞོམ་ན་ལམ་ཐག་ཉེ། །གཉེན་པོ་ཐུགས་ལ་བསྟེན་ཅིག་དིང་རི་བ། །བརྩོན་འགྲུས་མཐུ་སྟོབས་ཆུང་བས་འཚང་མི་རྒྱ། །གོ་ཆས་སླེབས་པར་གྱིས་ཤིག་དིང་རི་བ། །བག་ཆགས་འགྲོགས་ཡུན་རིང་བས་ཕྱི་འདོད་འོང་། །འདས་པའི་རྗེས་འཇུག་མ་བྱེད་དིང་རི་བ། །སེམས་ལ་གོ་རྟོགས་ཆུང་ན་གསོལ་བ་ཐོབ། །རྟོགས་པ་ཤུགས་ལ་འཆར་རོ་དིང་རི་བ། །ཕྱི་མར་སྐྱིད་པར་འདོད་ན་སྡུག་སྲན་སྐྱེད། །སངས་རྒྱས་རྩ་ན་གདའོ་དིང་རི་བ། །འདུས་པའི་སྔ་དྲོ་འབྲལ་བའི་བརྡ་ཞིག་བྱུང༌། །འདུ་འབྲལ་སེམས་ལ་གཟན་ནོ་དིང་རི་བ། །གྲོགས་པོ་ཕལ་ཆེར་ཕྱི་མའི་གནས་སུ་ཐལ། །མཛའ་གྲོགས་རྒྱགས་ཕྱེད་ཡོད་དམ་དིང་རི་བ། །སྡུག་བསྔལ་ཐམས་ཅད་སྡིག་པའི་ལས་ལས་བྱུང༌། །སྡིག་པ་ཆུང་ཡང་སྤོངས་ཤིག་དིང་རི་བ། །བདེ་བ་ཐམས་ཅད་དགེ་བའི་ལས་ལས་བྱུང༌། །དགེ་བ་ཆུང་ཡང་སྒྲུབས་ཤིག་དིང་རི་བ། །དགེ་སྡིག་རྒྱུ་ལས་འབྲས་བུ་བདེ་སྡུག་འབྱུང༌། །སྡིག་སྤོང་དགེ་བ་སྒྲུབས་ཤིག་དིང་རི་བ། །ཨ་ཙ་ར་ནི་དིང་རིར་མི་སྡོད་འགྲོ །སྒྲོ་འདོགས་ད་ལྟ་ཆོད་ཅིག་དིང་རི་བ། །ངས་ནི་གཡེང་བ་མེད་པར་སྒྲུབ་པ་བྱས། །ཁྱེད་ཀྱང་རྗེས་སུ་ཞུགས་ཤིག་དིང་རི་བ། །དེ་ལྟར་རྗེ་བཙུན་དམ་པའི་ཞལ་གདམས་འདི། །རང་གཞན་ཡོངས་ལ་ཕན་ཕྱིར་བཀོད་པ་ཡིས། །ཐོས་ཚད་རྒྱུད་ལ་ཁོལ་ཞིག་ཤེས་ལྡན་དག །ཅེས་ཕ་གཅིག་རྗེ་བཙུན་དམ་པ་སངས་རྒྱས་ཀྱིས་དིང་རི་བ་རྣམས་ལ་བཀའ་སློབ་ཞལ་ཆེམས་སུ་གནང་བ་དིང་རི་བརྒྱ་རྩ་མ་ཞེས་བྱ་བ་རྫོགས་སོ།། །།

Sakya Yogi Drakpa Gyaltsen Gur ( Doha Song ) Tibetan

ས་སྐྱའི་རྗེ་བཙུན་གྲགས་པ་རྒྱལ་མཚན་མགུར་ཉམས་དབྱངས་ཆེན་མོ་བཞུགས། །

༄༅། །ན་མོ་གུ་རུ་བྷ་དྲཱ་ཡ། ཡོན་ཏན་མཐའ་དག་རྒྱུད་ལ་སྦྱོར་མཛད་པའི། །བླ་མ་ལྷ་དང་དབྱེར་མེད་བཞུགས་རྣམས་ལ། །ལུས་ངག་ཡིད་གསུམ་དང་བས་ཕྱག་ཀྱང་འཚལ། །གཟུང་འཛིན་གཉིས་དང་བྲལ་བའི་མཆོད་པ་འབུལ། །སྤྲོས་བྲལ་ངག་གི་ལས་འདས་ཡིད་ཀྱིས་བསྟོད། །དུས་གསུམ་སྡིག་གིས་མི་གོས་བཤགས་པ་བྱེད། །དམིགས་མེད་འཇིགས་དང་བྲལ་བའི་སྐྱབས་སུ་འགྲོ། །ཚད་བྲལ་དམིགས་ཡུལ་སྤངས་པའི་སེམས་བསྐྱེད་བྱེད། །དེ་ཡི་ཆོས་ཉིད་རང་བཞིན་ནམ་མཁའ་འདྲ། །བསགས་པ་མེད་པའི་དགེ་རྩ་བྱང་ཆུབ་བསྔོ། །སྣང་སྲིད་སྟོང་པའི་མཎྜལ་འདི་བཞེས་ལ། །སྐལ་ལྡན་བདག་ལ་བྱིན་གྱིས་བརླབ་ཏུ་གསོལ། །ལྟ་བ་གཏན་ལ་འབེབས་ཙམ་ན། །རྒྱལ་བ་རྣམས་ཀྱི་སྟོང་པ་ཉིད། །ལྟ་ཀུན་ཉེས་པ་འབྱུང་བར་གསུངས། །དེ་ཕྱིར་ལྟ་བ་ལྟ་རྒྱུ་མེད། ། ཤེས་རབ་ཅན་ལ་ལྟ་བ་མེད།  །བློ་རྣོན་པོ་ལ་ཚིག་ལས་འདས། །བརྩོན་འགྲུས་ཅན་ལ་བསྒོམ་རྒྱུ་མེད། །དད་པ་ཅན་ལ་རྒྱུ་འབྲས་མེད། །སྙིང་རྗེ་ཅན་ལ་སེམས་ཅན་མེད། །ཚོགས་བསགས་པ་ལ་སངས་རྒྱས་མེད། །མཐའ་བྲལ་ཤེས་བརྗོད་ཡུལ་ལས་འདས། །དབུ་མ་སེམས་ཙམ་ལ་སོགས་པ། །ཚིག་ཏུ་བརྗོད་པ་སྤྲཽས་པ་ཡིན། །ཡིད་ལ་སེམས་པ་རྣམ་རྟོག་ཡིན། །རང་བཞིན་བརྗོད་མེད་བསམ་མེད་ཡིན། །ཇི་སྲིད་ལྟ་བ་ཡོད་རིང་ལ། །སྡུག་བསྔལ་ཀུན་ལས་མི་གྲོལ་ཏེ། །རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་གསུངས། །ཐོས་པས་ཤེས་རྒྱུད་མ་གྲོལ་བར། །ལྟ་བ་ཚིག་ཏུ་མ་བཏང་ཅིག །ལུང་དང་རིགས་པ་མན་ངག་གིས། །ལྟ་བ་ཐག་ཆོད་བློ་རེ་བདེ། །སྒོམ་པ་ཉམས་ལེན་བྱེད་ཙམ་ན། །སྒོམ་མེད་སྒོམ་པ་པོ་ཡང་མེད། །ཡུལ་མེད་མཐའ་བྲལ་སྒོམ་པ་དེ། །བྱ་བ་ཐོང་ལ་ཉམས་སུ་ལོང༌། །སེམས་མེད་སེམས་ཀྱི་སེམས་ལ་ལྟོས། །མཐོང་རྒྱུ་བྱུང་ན་སེམས་ཉིད་མིན། །མཐོང་མེད་མཐོང་བས་སེམས་ཉིད་མཐོང༌། །མཐོང་མེད་སེམས་ལ་མ་ཡེངས་ཞོག །ཆགས་ན་གསལ་བས་ཟིན་པར་མཛོད། །རྒོད་ན་དྲན་པའི་ལྕགས་ཀྱུས་ཟུང༌། །གསལ་ལ་མི་རྟོག་སྒོམ་པ་ཡིན། །ཉམས་ཀྱི་རྩི་ཡིས་མ་ཟིན་པར། །སྒོམ་པ་ཚིག་ཏུ་མ་བཏང་ཅིག །སྙིང་རྗེ་སེམས་བསྐྱེད་སྔོན་དུ་བཏང་། །མཇུག་ཏུ་དགེ་བ་བྱང་ཆུབ་བསྔོ། །སྤྱོད་པ་ཉམས་སུ་ལེན་ཙམ་ན། །ལྟ་སྒོམ་ཉམས་སུ་མྱོང་བ་ཡིན། །སྣང་བའི་དངོས་པོ་རྒྱས་བཏབ་ནས། །བླང་དོར་མེད་པའི་སྤྱོད་པ་མཛོད། །མ་བཅོས་ཤུགས་འབྱུང་སྤྱོད་པ་དེ། །ཚུལ་འཆོས་ཕྱོགས་སུ་མ་བཏང་ཅིག །གྲོགས་སུ་འགྲོ་བའི་སྤྱོད་པ་དེ། །ཐོ་ཅོའི་ཕྱོགས་སུ་མ་བཏང་ཅིག །འཛིན་མེད་རོ་སྙོམས་སྤྱོད་པ་དེ། །ཆགས་སྡང་ཕྱོགས་སུ་མ་བཏང་ཅིག་ །བྱར་མེད་ལྷུག་པའི་སྤྱོད་པ་དེ། །སྡིག་པའི་ཕྱོགས་སུ་མ་བཏང་ཅིག ། འཁོར་གསུམ་ཡང་དག་སྤྱོད་པ་དེ། །ཟག་བཅས་དགེ་བར་མ་བཏང་ཅིག །དགེ་མེད་སྡིག་མེད་སྤྱོད་པ་དེ། །ལུང་མ་བསྟན་དུ་མ་བཏང་ཅིག །སངས་རྒྱས་གཏན་ལ་འབེབས་ཙམ་ན། །སེམས་ལས་མ་གཏོགས་ཆོས་རྣམས་མེད། །སེམས་ཉིད་རྟོགས་ན་སངས་རྒྱས་ཡིན། །སངས་རྒྱས་གཞན་དུ་མ་བཙལ་ཞིག །ཆོས་སྐུ་དག་པ་གཉིས་ལྡན་དེ། །གཞི་ཡི་ཕྱོགས་སུ་མི་གཏང་འཚལ། །གཟུགས་སྐུ་གདུལ་བྱའི་སྣང་བ་ལ། །སངས་རྒྱས་ངོ་བོར་མ་འཛིན་ཅིག །གཞི་ལ་སངས་རྒྱས་མེད་པ་ལ། །ཐོབ་ཏུ་རེ་བ་མི་བགྱིད་འཚལ། །དོན་ལ་སེམས་ཅན་མེད་པ་ལ། སྡུག་གི་དོགས་པ་མི་བགྱིད་འཚལ། །ལྟ་བ་བསམ་བརྗོད་མེད་པ་ལ། །མདོ་རྒྱུད་ཐོས་བསམ་བྱས་པས་འཁྲུལ། །སྒོམ་པ་མཐའ་དང་བྲལ་བ་ལ། །ལུས་སེམས་རྩོལ་བ་བྱས་པས་འཁྲུལ།།སྤྱོད་པ་ཤུགས་འབྱུང་འགག་མེད་དེ། །ཚུལ་འཆོས་ཐོ་ཅོར་ཤོར་བས་འཁྲུལ། །འབྲས་བུ་འཁོར་འདས་དབྱེར་མེད་དེ། །རེ་དོགས་ཕྱོགས་སུ་ཤོར་བས་འཁྲུལ། །ལྟ་བ་དབུ་མ་ཆེན་པོ་དེ། ཁས་ལེན་མེད་དེ་མ་འཁྲུལ་བདེ། ། སྒོམ་པ་ལུས་སེམས་ལྷུག་པ་དེ། །རྩོལ་སྒྲུབ་མེད་དེ་མ་འཁྲུལ་བདེ། །སྤྱོད་པ་ཆགས་སྡང་རྒྱུ་གཞི་དེ། །བླང་དོར་མེད་དེ་མ་འཁྲུལ་བདེ། །འབྲས་བུ་ཕྱག་རྒྱ་ཆེན་པོ་དེ། །རེ་དོགས་མེད་པས་མ་འཁྲུལ་བདེ། །ལྟ་བ་སྤྲོས་པ་མེད་ན་ཡིན། ། སྒོམ་པ་ཡེངས་པ་མེད་ན་ཡིན། །སྤྱོད་པ་བྱ་བ་ཐོང་ན་ཡིན། །འབྲས་བུ་སེམས་ཉིད་རྟོགས་ན་ཡིན། །སྒྲོ་འདོགས་ཆོད་ན་ལྟ་བ་ཡིན། །ཡེངས་པ་མེད་ན་སྒོམ་པ་ཡིན། །ཞེན་ཆགས་མེད་ན་སྤྱོད་པ་ཡིན། །ཡོན་ཏན་རྫོགས་ན་འབྲས་བུ་ཡིན། །ལར་ལྟ་བ་རྟོགས་པའི་སྐྱེས་བུ་ལ། །སྒོམ་དུ་ཅི་ཡང་མི་གདའ་ན། །ཉམས་ལེན་མེད་པའི་སྒོམ་ཆེན་དེ། །སྤྱོད་པ་སྤྱད་རྒྱུ་མི་གདའ་ན། །སྤྱོད་དང་བྲལ་བའི་རྣལ་འབྱོར་ལ། །འབྲས་བུ་ཅི་ཡང་མི་གདའ་ན། །ལྟ་བ་མེད་པ་ལྟ་བའི་མཆོག །གྲུབ་མཐའ་འདི་ལ་དགོས་པ་མེད། །སྒོམ་དུ་མེད་པ་བསྒོམ་པའི་མཆོག ། སེམས་འཛིན་འདི་ལ་དགོས་པ་མེད། །སྤྱོད་པ་མེད་པ་སྤྱོད་པའི་མཆོག །ཚུལ་འཆོས་འདི་ལ་དགོས་པ་མེད། །འབྲས་བུ་མེད་པ་འབྲས་བུའི་མཆོག །རེ་དོགས་འདི་ལ་དགོས་པ་མེད། །ལར་གནས་ལུགས་དོན་ལ་མཐོང་རྒྱུ་མེད། །ད་ནི་ལྟ་ཡང་མི་ལྟའོ། །གཉུག་མ་འདི་ལ་བསྒོམ་རྒྱུ་མེད། །ད་ནི་བསྒོམ་ཡང་མི་བསྒོམ་མོ། །དབྱིངས་ཀྱི་ངང་ལ་སྤྱོད་དུ་མེད། །ད་ནི་སྤྱད་ཀྱང་མི་སྤྱད་དོ། །ལྟ་བ་མཐའ་དབུས་མི་གདའ་ན། །ནམ་མཁའ་ཡིན་པ་ཀ་སྙམ་བགྱིད།།སྒོམ་ལ་གཡོ་འགུལ་མི་གདའ་ན། །རི་བོ་ཡིན་པ་ཀ་སྙམ་བགྱིད། །ཉམས་ལ་གསལ་འགྲིབ་མི་གདའ་ན། །ཉི་ཟླ་ཡིན་པ་ཀ་སྙམ་བགྱིད། །སྤྱོད་པ་བླང་དོར་མི་གདའ་ན། །ས་གཞི་ཡིན་པ་ཀ་སྙམ་བགྱིད། ། འབྲས་བུ་རེ་དོགས་མི་གདའ་ན། །ཞེན་ལོག་ཡིན་པ་ཀ་སྙམ་བགྱིད། །ལྟ་ཐོག་ཏུ་སྒོམ་པ་ཁེལ་མ་ཁེལ། །ལྟ་ཐོག་ཏུ་སྒོམ་པ་ཁེལ་ཙམ་ན། །གཉུག་མའི་དོན་ལ་ཡེངས་བ་མེད། །སྒོམ་ཐོག་ཏུ་ལྟ་བ་ཁེལ་མ་ཁེལ།། སྒོམ་ཐོག་ཏུ་ལྟ་བ་ཁེལ་ཙམ་ན། །བསམ་གཏན་གྱི་རོ་ལ་ཆགས་པ་མེད། །སྤྱོད་ཐོག་ཏུ་ལྟ་སྒོམ་ཁེལ་མ་ཁེལ། །སྤྱོད་ཐོག་ཏུ་ལྟ་སྒོམ་ཁེལ་ཙམ་ན། །མཉམ་རྗེས་མེད་པའི་ཉམས་རྟོགས་འཆར། །སེམས་ལ་རྟོགས་པ་མ་སྐྱེས་པའི། །ལྟ་བ་མཐོ་བས་ཅི་ལ་ཕན། །ཉོན་མོངས་གཉེན་པོར་མ་སོང་བས། །སྒོམ་པ་བཟང་བས་ཅི་ལ་ཕན། །ཤེས་རབ་སྙིང་རྗེས་མ་ཟིན་པས། །སྤྱོད་པ་ཞིབ་པས་ཅི་ལ་ཕན། །རང་སྐྱོན་ཁ་ཡང་མ་འབྲི་བས། །ཡེ་སངས་རྒྱས་ཀྱིས་ཅི་ལ་ཕན། །སྐྱེ་བ་མེད་པའི་དོན་རྟོགས་ན། །ལྟ་བ་ཚད་དུ་སྐྱོལ་བ་ཡིན། །མཉམ་གཞག་རྗེས་ཐོབ་གཉིས་མེད་ན།། སྒོམ་པ་ཚད་དུ་སྐྱོལ་བ་ཡིན། །ཚར་གཅད་རྗེས་གཟུང་སྙོམས་པ་ན། །སྤྱོད་པ་ཚད་དུ་སྐྱོལ་བ་ཡིན། །ཆོས་སྐུ་གཟུགས་སྐུ་གཉིས་ཐོབ་ན། །འབྲས་བུ་ཚད་དུ་སྐྱོལ་བ་ཡིན། །ལྟ་བ་རང་གི་སེམས་ལ་དྲིས།།རྟག་ཆད་འདུག་གམ་མི་འདུག་ལྟོས། ། སྒོམ་པ་རང་གི་སེམས་ལ་དྲིས། །ཡེངས་པ་འདུག་གམ་མི་འདུག་ལྟོས།། སྤྱོད་པ་རང་གི་སེམས་ལ་དྲིས། །ཐ་མལ་འདུག་གམ་མི་འདུག་ལྟོས། །འབྲས་བུ་རང་གི་སེམས་ལ་དྲིས། །དཀའ་ཐུབ་ནུས་སམ་མི་ནུས་ལྟོས། །ལྟ་བ་སེམས་ཀྱི་སྐྱེལ་མ་ཡིན། །སྒོམ་པ་སེམས་ཀྱི་འགྲོ་ལམ་ཡིན། །སྤྱོད་པ་སེམས་ཀྱི་གྲོགས་པོ་ཡིན། །འབྲས་བུ་སེམས་ཀྱི་སུན་མ་ཡིན། །ལྟ་བའི་དགུང་སྔོན་མཐོ་ན་བཞེད། ། སྒོམ་པའི་རྒྱ་མཚོ་ཟབ་ན་བཞེད། །སྤྱོད་པའི་ཞིང་ས་གཤིན་ན་བཞེད། །འབྲས་བུའི་ལོ་ཏོག་སྨིན་ན་བཞེད། །བདག་ཤེས་རབ་ཅན་ཡང་མ་ལགས་ཏེ། །བླ་མ་མཁས་པ་བསྟེན་པ་དང༌། །ཐོས་བསམ་བྱས་པའི་ཡོན་ཏན་གྱིས། །རྟོགས་པའི་གོ་ཚུལ་འདི་ལྟར་སྐྱེས། །རྒྱ་མཚོའི་རུས་སྦལ་གཉའ་ཤིང་ལྟར། །མི་ལུས་ཐོབ་པ་དཀའ་བར་གོ །འཇོག་པོའི་གཙུག་གི་ནོར་བུ་བཞིན། །བླ་མ་རྙེད་པར་དཀའ་བར་གོ །དུས་བཞི་ལུས་ཀྱི་འགྱུར་བ་འདི།།འཆི་བའི་བྱ་གཏོང་ཡིན་པར་གོ ། སྐྱེས་བུ་དགྲ་ཡི་ཡུལ་བཏོན་བཞིན། །ཐམས་ཅད་བཞག་ནས་འགྲོ་བར་གོ །རྨ་བྱའི་མདོངས་ཀྱི་ཁ་དོག་བཞིན། །ཐམས་ཅད་ལས་ལས་སྐྱེས་པར་གོ །རང་བཞིན་སྟོང་པ་ཉིད་རྟོགས་ན། །འཁོར་བར་སྐྱེ་བ་མེད་པར་གོ །མེ་ལོང་ནང་གི་གཟུགས་བརྙན་བཞིན། །སྣང་བའི་རང་བཞིན་སྟོང་པར་གོ །རྨི་ལམ་ལྟད་མོ་མཐོང་བ་བཞིན། །སྟོང་པའི་རང་བཞིན་སྣང་བར་གོ ཁ་ཆུ་དྭངས་པའི་གསེར་བཞིན་དུ། །རང་བཞིན་རྣམ་པར་དག་པར་གོ །སྤྲིན་དང་རྙོག་མ་གཡའ་བཞིན་དུ། །རྣམ་རྟོག་གློ་བུར་ཡིན་པར་གོ །རྣམ་རྟོག་འཁོར་བ་ཡིན་པར་གོ །རྟོག་མེད་མྱང་འདས་ཡིན་པར་གོ །འཁོར་བ་སྡུག་བསྔལ་ཡིན་པར་གོ །ཐར་པ་བདེ་བ་ཡིན་པར་གོ །བདེ་སྡུག་གཉིས་སུ་མེད་པར་གོ །ཡེ་སྟོང་ཡེ་བྲལ་ཡིན་པར་གོ ། ལར་སེམས་ལ་གོ་རྟོགས་ཤར་ན་བདེ། །ལྟ་བ་རྟོགས་ན་ཡང་ཀྱང་བདེ། །རྣམ་པར་སྨིན་པའི་སྒྱུ་ལུས་བདེ། །ན་ཚ་མེད་ན་ཡང་ཀྱང་བདེ།།རི་ཁྲོད་དགོན་པ་བརྟེན་ན་བདེ། །བྱ་བ་བཏང་ན་ཡང་ཀྱང་བདེ། །ཆོས་དང་མཐུན་པའི་འཚོ་བ་བདེ། །ལོག་འཚོ་སྤངས་ན་ཡང་ཀྱང་བདེ། །ལུས་སེམས་གཞོན་པའི་འདོད་ཡོན་བདེ། །ཐབས་ཀྱིས་ཟིན་ན་ཡང་ཀྱང་བདེ། ། ལྟ་སྤྱོད་མཐུན་པའི་གྲོགས་པོ་བདེ།། གཅིག་པུར་སྡོད་པའི་ཉམས་ལེན་བདེ། །ཞེན་ཆགས་མེད་པའི་ཟས་ནོར་བདེ། ། ངེས་པ་མེད་པའི་སྡོད་ས་བདེ། །ངོ་སྲུང་བྲལ་བའི་མཐུན་འཇུག་བདེ། །རང་དབང་རང་གིས་ཐོབ་ན་བདེ། །བདག་བསོད་ནམས་ཅན་ཞིག་མ་ལགས་ཏེ། །མི་ལུས་གཙང་མ་ཐོབ་པ་དང༌། །སངས་རྒྱས་བསྟན་པ་དར་བ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །མི་ཆོས་ལ་ཞེན་པ་ལོག་པ་དང༌། །ལྷ་ཆོས་ལ་སྤྲོ་བ་སྐྱེས་པ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །རང་ཡུལ་སྤངས་ནས་ཕྱིན་པ་དང༌། །བྱེས་སུ་བླ་མ་མཇལ་བ་གཉིས། །དེ་གཉིས་དུས་མཉམ་གཅིག་ཏུ་བྱུང་། །སྡེ་སྣོད་ལ་ཐོས་པ་བྱས་པ་དང༌། །ཚིག་དོན་གཉིས་ཀ་ཤེས་པ་གཉིས། ། དེ་གཉིས་དུས་མཉམ་གཅིག་ཏུ་བྱུང༌། །སྔགས་ཀྱི་བླ་མ་རྙེད་པ་དང༌། །དབང་བཞི་རྫོགས་པར་ཐོབ་པ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །སྙན་རྒྱུད་གདམས་ངག་གནང་བ་དང༌། །ངེས་ཤེས་གཏིང་ནས་སྐྱེས་པ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །རྗེ་ལ་མོས་པ་སྐྱེས་པ་དང༌། །བྱིན་རླབས་རྒྱུད་ལ་ཞུགས་པ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །ཕྱི་ཡུལ་སྒྲོ་འདོགས་ཆོད་པ་དང༌། །རང་བྱུང་ཡེ་ཤེས་ཤར་བ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །བསྐྱེད་རིམ་ལྷ་རུ་གསལ་བ་དང༌། །རྫོགས་རིམ་ཉམས་སུ་མྱོང་བ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །ལུས་ལ་བདེ་དྲོད་འབར་བ་དང་། །སེམས་ལ་སྣང་སྟོང་སྐྱེས་པ་གཉིས། །དེ་གཉིས་དུས་མཉམ་གཅིག་ཏུ་བྱུང་། །ཀུན་རྫོབ་འཁྲུལ་པར་གོ་བ་དང༌། །དོན་དམ་སྟོང་པར་ཤེས་པ་གཉིས། ། དེ་གཉིས་དུས་མཉམ་གཅིག་ཏུ་བྱུང༌། །ཤེས་པ་ཡུལ་ལ་ཤོར་བ་དང༌།  །དྲན་པའི་ལྕགས་ཀྱུས་ཟིན་པ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །རྐྱེན་ངན་ཇག་པ་བྱུང་བ་དང༌། །གཉེན་པོའི་ར་མདའ་སླེབ་པ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །འདོད་པ་ཡུལ་ལ་ཤོར་བ་དང༌། །ཐབས་ལ་མཁས་པས་ཟིན་པ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །བདེ་སྡུག་ཉམས་སུ་མྱོང་བ་དང༌། །དེ་ཉིད་སྒྱུ་མར་ཤེས་པ་གཉིས། །དེ་གཉིས་དུས་མཉམ་གཅིག་ཏུ་བྱུང༌།། སེམས་ཅན་སྡུག་བསྔལ་མཐོང་བ་དང༌། །སྙིང་རྗེ་གཏིང་ནས་སྐྱེས་པ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །རྒོལ་བའི་ཀླན་ཀ་བྱུང་བ་དང༌། །གཏན་ཚིགས་ཁོང་ནས་ཤར་བ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །བསོད་ནམས་ཆུ་མིག་རྡོལ་བ་དང། །ཟས་ནོར་ཞེན་པ་ལོག་པ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །ཚུལ་འཆོས་སྤྱོད་པ་དོར་བ་དང༌། །ཅི་དགའི་སྤྱོད་པ་བྱེད་པ་གཉིས། །དེ་གཉིས་དུས་མཉམ་གཅིག་ཏུ་བྱུང༌། །ཐོས་དང་ཤེས་རབ་འཛོམ་ཡང་འཚལ། །ལུང་དང་རིགས་པར་འཛོམ་ཡང་འཚལ། །བླ་མ་བརྒྱུད་པར་འཛོམ་ཡང་འཚལ། །གདམས་ངག་ཉམས་ལེན་འཛོམ་ཡང་འཚལ།།དད་པ་བརྩོན་འགྲུས་འཛོམ་ཡང་འཚལ། །ཡོན་ཏན་གྲགས་པར་འཛོམ་ཡང་འཚལ། །ཤེས་རབ་མེད་པའི་ཐོས་པ་དེས། །གོ་རྟོགས་སྐྱེ་བར་མི་གདའ་ན། །ལུང་གིས་མ་ཟིན་རིགས་པ་དེས། །ངེས་ཤེས་སྐྱེ་བར་མི་གདའ་ན། །བརྒྱུད་པ་མེད་པའི་བླ་མ་དེས།།བྱིན་རླབས་འབྱུང་བར་མི་གདའ་ན། །བརྩོན་འགྲུས་མེད་པའི་དད་པ་དེས། །ལག་ཏུ་ལོན་པར་མི་གདའ་ན། །ཉམས་ལེན་མེད་པའི་གདམས་ངག་དེས། །རང་ལ་ཕན་པར་མི་གདའ་ན། ། གྲགས་པ་མེད་པའི་ཡོན་ཏན་དེས། །གཞན་ལ་ཕན་པར་མི་གདའ་ན། །སྒོང་མེད་བྱ་དེ་གང་ནས་བྱུང༌། །བྱ་མེད་སྒོ་ང་ཅི་ལས་བྱུང༌། །བྱ་དང་སྒོ་ང་གང་སྔའོ། །རང་བཞིན་སྐྱེ་བ་མེད་པ་ལ། །རྐྱེན་གྱིས་བྱེད་པར་མི་འཇུག་ན། །རྒྱུ་དང་འབྲས་བུ་གང་སྔའོ། །སེམས་ཉིད་གདོན་ནས་དག་པ་ལ། །རྣམ་རྟོག་ཡེ་ཤེས་གཉིས་མེད་ན། །སངས་རྒྱས་སེམས་ཅན་གང་སྔའོ། །ཆོས་རྣམས་ཡེ་ནས་མེད་པ་ལ། །འབྲས་བུ་སངས་རྒྱས་མི་འབྱུང་ན།།ཆོས་དང་སངས་རྒྱས་གང་སྔའོ། །དོན་ལ་ཅི་ཡང་མེད་པ་ལ། །འཁྲུལ་དང་མ་འཁྲུལ་གཉིས་མེད་ན། །ཀུན་རྫོབ་དོན་དམ་གང་སྔའོ། །དོན་ལ་སངས་རྒྱས་མེད་པ་ལ།  

།སྡེ་སྣོད་གསུམ་པོ་སུ་ཡིས་གསུངས། །སྟོན་པས་ཆོས་འགའ་མ་གསུངས་ན། །པུསྟི་གླེགས་བམ་ཇི་ལྟར་ཡིན། །འགག་པ་དངོས་མེད་ཤི་བ་དང༌། །སྐྱེ་བར་འགྱུར་བ་གང་ཐམས་ཅད། །བྱས་པ་དོན་མེད་ཅེས་གསུངས་ན། །ལས་ལས་འབྲས་བུ་ཅང་འབྱུང་ངམ། །རང་བཞིན་གདོད་ནས་མ་སྐྱེས་པ། །འགག་པར་འགྱུར་བ་ཇི་ལྟར་ཡིན། །ཆོས་ཀྱི་དབྱིངས་ལས་མ་གཏོགས་པའི། །དངོས་པོ་གང་ཡང་ཡོད་པ་མིན། །འགྱུར་བ་མེད་པའི་ཆོས་ཉིད་དེ། །སྐྱེ་འགག་ཡོད་པ་ཇི་ལྟར་ཡིན། །ཆོས་རྣམས་ཐམས་ཅད་བརྫུན་ཡིན་ན། །བློ་ལྟོས་བྱེད་པ་ཇི་ལྟར་ཡིན། །ཆོས་རྣམས་ཐམས་ཅད་བདེན་ཡིན་ན། །ཐམས་ཅད་བསླུ་བ་ཇི་ལྟར་ཡིན། །འཁོར་བ་སྡུག་བསྔལ་ཉིད་ཡིན་ན།།སྡིག་པ་བྱེད་པ་ཤིན་ཏུ་འཁྲུལ།། མཐོ་རིས་ཐར་པ་མེད་གསུངས་ན། །དེ་རྒྱུ་དགེ་བ་བྱེད་པ་འཁྲུལ། །ལས་འབྲས་བདེན་པ་ཉིད་ཡིན་ན། །རང་བཞིན་སྟོང་པ་ཡིན་པ་འཁྲུལ། །ཆུ་ཟླ་ནམ་མཁའི་ཟླ་བ་མིན། །དེ་ལ་མ་ལྟོས་དེ་སྣང་མེད། །དེ་བཞིན་དངོས་པོ་ཐམས་ཅད་ཀྱི། །རང་བཞིན་བདེན་པ་གཉིས་སུ་གསུངས། ། །བདེན་པ་གཉིས་ལས་མ་གཏོགས་པའི། ། ཆོས་དེ་འཐད་པར་མི་འགྱུར་ཏེ།།རང་བཞིན་བདེན་མིན་བརྫུན་མིན་པས། ། བདེན་པ་གཉིས་སུ་འཛིན་པ་འཁྲུལ། །འདོད་ཡོན་སྲེད་པའི་ཚྭ་ཆུ་ལ། །ངོམས་པའི་དུས་གཅིག་མི་གདའ་ན། །མཛེ་པོས་མེ་ལོང་བལྟས་པ་བཞིན། །ཞེན་པ་ལོག་ན་ངོམས་པ་ལགས། །དུཿཁ་ཆུ་བོའི་གཉེར་མ་ལ། །སངས་པའི་དུས་གཅིག་མི་གདའ་ན། །ཐབས་ཀྱིས་མེ་བསད་དུ་བ་བཞིན། །སྡིག་ལས་ལོག་ན་སངས་པ་ཡིན། །སྐྱེ་རྒ་ན་འཆིའི་ཆུ་བོ་ལས། །ཐར་པའི་དུས་གཅིག་མི་གདའ་ན། །ཆུ་ལ་ཟམ་པ་བཙུགས་པ་བཞིན། །སྐྱེ་མེད་རྟོགས་ན་ཐར་པ་ལགས། །འཁོར་བའི་རྒྱ་མཚོ་ཆེན་པོ་ལ། །བསྐམ་པའི་དུས་གཅིག་མི་གདའ་ན། །སྲིད་པའི་ཉི་བདུན་ཤར་བ་བཞིན། །འདོད་སྲེད་ལོག་ན་སྐམ་པ་ཡིན། །འདུས་བྱས་བྱ་བའི་ལས་ཀ་ལ། །ཟིན་པའི་དུས་གཅིག་མི་གདའ་ན། །ཆུ་དག་འོལ་ཁ་བསྒྱུར་བ་བཞིན། ། ཅོག་གིས་བཞག་ན་ཟིན་པ་ལགས། །གཏི་མུག་མུན་པས་ཐིབས་པོ་ལ། །སངས་པའི་དུས་གཅིག་མི་གདའ་ན། །མུན་ཁུང་ནང་དུ་སྒྲོན་མེ་བཞིན། །ཡེ་ཤེས་ཉི་མ་ཤར་ན་སངས།།བདག་མེད་ཡེ་ཤེས་ཉི་མ་ལ། །འཆར་བའི་དུས་གཅིག་མི་གདའ་ན། །ཉི་མ་འཆར་བའི་སྐྱ་རེངས་བཞིན། །ཆོས་མཆོག་རྒྱུད་ལ་སྐྱེས་ན་འཆར། །རྣམ་རྟོག་ཉོན་མོངས་ཟུག་རྔུ་ལ། །འབྱིན་པའི་དུས་གཅིག་མི་གདའ་ན། །སྨན་པ་མཁས་པས་མདེའུ་བཏོན་བཞིན། །གཉེན་པོ་སྟོབས་དང་ལྡན་ན་འབྱིན། །བདག་འཛིན་སེར་སྣའི་མདུད་པ་ལ། །གྲོལ་བའི་དུས་གཅིག་མི་གདའ་ན། །དར་གྱི་མདུད་པ་བཀྲོལ་བ་བཞིན། །ལོངས་སྤྱོད་སྒྱུ་མར་ཤེས་ན་གྲོལ། ཁམས་གསུམ་འཁོར་བའི་བཙོན་དོང་ནས། །ཐར་པའི་དུས་གཅིག་མི་གདའ་ན།། བཙོན་བུ་དོང་ནས་བཏོན་པ་བཞིན། །གཟུང་འཛིན་ལྕགས་སྒྲོག་གྲོལ་ན་ཐར། ། མྱ་ངན་འདས་པའི་གྲོང་ཁྱེར་དུ། །ཕྱིན་པའི་དུས་གཅིག་མི་གདའ་ན། །འགྲོན་པོ་ལམ་དུ་ཞུགས་པ་བཞིན། །ཐར་པའི་ལམ་སྣ་ཟིན་ན་ཕྱིན། །བླ་མ་དགེ་བའི་བཤེས་གཉེན་དང༌།།མཇལ་བའི་དུས་གཅིག་མི་གདའ་ན། །རྟག་ཏུ་ངུ་དང་ཆོས་འཕགས་བཞིན། །སྔོན་སྦྱངས་ལས་འཕྲོ་ཡོད་ན་མཇལ། །གདམས་ངག་བདུད་རྩིའི་ཆུ་རྒྱུན་ལ། འཐུང་བའི་དུས་གཅིག་མི་གདའ་ན།།སྐོམ་པས་བཏུང་བ་རྙེད་པ་བཞིན། །སྣོད་ལྡན་བྱ་བ་བཏང་ན་འཐུང༌། །གཉིས་མེད་ཕྱག་རྒྱ་ཆེན་པོ་ལ། ། རྟོགས་པའི་དུས་གཅིག་མི་གདའ་ན། །རྔ་མོ་བུ་དང་འཕྲད་པ་བཞིན།།སེམས་ངོ་ཤེས་ན་རྟོགས་པ་ལགས། །ཐ་སྙད་ཚིག་གི་ལོ་མ་ལ། །འཛད་པའི་དུས་གཅིག་མི་གདའ་ན། །ཀ་ཆ་ཟད་པའི་ཡོ་ལང་བཞིན། །རྣམ་རྟོག་ཟད་ན་འཛད་པ་ལགས།།རང་རྒྱུད་ཀོ་བ་གྱོང་པོ་ལ། །ཐུལ་བའི་དུས་གཅིག་མི་གདའ་ན། །ཆུ་སེར་ཅན་ལ་ཀླད་ཆུ་བཞིན། །ཆོས་བཞིན་བྱེད་ན་ཐུལ་བ་ལགས། །སྐུ་གསུམ་ཡེ་ཤེས་ལྔ་ལྡན་ལ། །ཐོབ་པའི་དུས་གཅིག་མི་གདའ་ན། །བསོད་ནམས་བསགས་པའི་རྒྱལ་སྲིད་བཞིན།།ཚོགས་གཉིས་རྫོགས་ན་ཐོབ་པ་ལགས། །ཐོས་བསམ་བྱས་པའི་གྲྭ་པ་རྣམས། །མདོ་རྒྱུད་དགོངས་པ་ལོངས་ལགས་སམ། །སྒྲོ་འདོགས་ཆོད་པ་མེད་ཉེན་ཆེའོ། །ཐ་སྙད་ཕྱོགས་སུ་མི་བཏང་འཚལ། །ཟིན་བཤད་མཛད་པའི་སྟོན་པ་ཀུན། །རང་ལ་ངེས་ཤེས་བདོག་ལགས་སམ།།དམ་པའི་གདམས་ངག་རྩད་ཆོད་ཅིག།མཁས་པ་ཐ་མལ་འཆི་ཉེན་གདའོ། །ཉམས་ལེན་མཛད་པའི་སྒོམ་ཆེན་ཀུན། །བྲེ་མོའི་ལས་ལ་མ་དགའ་མཛོད། །ལྟོ་རྒྱབ་གདུང་བ་མ་ཆེ་མཛོད། །བསམ་གཏན་རོ་ལ་མ་ཆགས་མཛོད། །སྡིག་ལས་ལོག་པའི་ཆོས་པ་ཀུན། །མདོ་རྒྱུད་ལྟ་རྟོགས་བག་རེ་མཛོད། །སྐབས་སུ་བླ་མའི་ཕྱགས་ཕྱིར་འབྲང༌། །རྟག་ཏུ་རང་གི་སེམས་ལ་ལྟོས། །དགེ་བའི་ཕྱོགས་ལ་གཡེལ་བ་ན། །འཆི་བའི་འགྱུར་བ་ཡིད་ལ་གྱིས། །ཡུལ་ལ་ཆགས་སྡང་སྐྱེས་པ་ན། །ཆོས་ཀྱི་ཆོས་ཉིད་ཡིད་ལ་གྱིས།། འཁོར་དང་ཟང་ཟིང་འབྲེལ་བ་ན། །བདུད་ཀྱི་བསླུ་བྲིད་ཤེས་པར་གྱིས། །ཇི་ལྟར་བྱས་ཀྱང་མ་བདེ་ན། །འཁོར་བའི་ཉེས་དམིགས་ཡིད་ལ་གྱིས། །ཆོས་ཀྱིས་འདི་དང་ཕྱི་མར་བདེ། །སྲིད་པ་བར་དོར་བདེ་བ་སྟེ། །སྐྱེ་བ་ཕྱི་མར་བདེ་བ་ཡིན། ། སྐྱེ་བ་མེད་པས་ཤིན་ཏུ་བདེ། །རང་བདེ་གཞན་བདེ་གཉིས་ཀ་བདེ། །དེ་བས་རྟག་ཏུ་ཆོས་མཛོད་ཅིག །མི་ལུས་གཙང་མ་ཐོབ་དུས་སུ། །ལྷ་ཆོས་མི་བགྱིད་ཇི་ལྟར་ལགས། །བླ་མ་དམ་པ་བསྟེན་བསྟེན་ནས། །མཉེས་པར་མི་བགྱིད་ཇི་ལྟར་ལགས། །གདམས་ངག་ཟབ་མོ་ཞུ་ཞུ་ནས། །ཉམས་སུ་མི་ལེན་ཇི་ལྟར་ལགས།། ཆོས་ལ་ངེས་ཤེས་སྐྱེས་སྐྱེས་ནས། །སླར་ལ་ལྡོག་པ་ཇི་ལྟར་ལགས། །ལར་རང་ཡུལ་སྤོངས་ལ་བྱེས་སུ་སྡོད། །ཡུལ་དང་བྲལ་ཡང་འགྱོད་པ་མེད། །བློ་ཕུགས་དཀར་པོའི་ཆོས་ལ་གཏོད། །དམྱལ་བར་སྐྱེས་ཀྱང་འགྱོད་པ་མེད། །ཡི་དམ་གཙོ་བོར་བླ་མ་བསྟེན། །ཡོ་བྱད་ཟད་ཀྱང་འགྱོད་པ་མེད། །བླ་མ་བསྙེན་བཀུར་གང་ཡིན་བྱ། །ཐུགས་མི་འདོགས་ཀྱངའགྱོད་པ་མེད།།ལུང་དང་བསྟུན་པའི་མན་ངག་ཞུ། །ཉམས་ལེན་མ་བྱུང་འགྱོད་པ་མེད། །དགེ་སྦྱོར་གཙོ་བོར་བྱ་བ་ཐོང༌། ། དངོས་གྲུབ་མ་ཐོབ་འགྱོད་པ་མེད། །སོ་ནམ་གཙོ་བོར་དམ་ཚིག་སྲུངས། །གྲོགས་ཀྱིས་ཁྲེལ་ཡང་འགྱོད་པ་མེད། །ཚོགས་སོགས་མི་ཚེ་ཆོས་ལ་སྐྱོལ། །ཤི་བར་གྱུར་ཀྱང་འགྱོད་པ་མེད། །རང་རེ་མི་འགྱོད་ཙམ་རེ་མཛོད། །གཞན་གྱིས་འཕྱས་ཀྱང་འགྱོད་པ་མེད། །གྲོགས་ལ་མ་དགའ་གཅིག་པུར་སྡོད། །ནད་གཡོག་མེད་ཀྱང་འགྱོད་པ་མེད། །ལྟ་རྟོགས་གཙོ་བོར་སེམས་ལ་ལྟོས། །གོ་རྟོགས་ཆུང་ཡང་འགྱོད་པ་མེད།།ནད་དང་མཐུན་པའི་ཁ་ཟས་བསྟེན། །ན་ཚ་བྱུང་ཡང་འགྱོད་པ་མེད། ། རྟེན་དང་མཐུན་པའི་སྤྱོད་པ་གྱིས། །ཚུལ་འཆོས་སོང་ཡང་འགྱོད་པ་མེད། ། གཞན་སྐྱོན་མ་རྟོག་རང་སྐྱོན་རྟོག །ཤ་ཚ་ཆུང་ཡང་འགྱོད་པ་མེད། །བསམ་མནོའི་གཙོ་བོར་གཞན་ཕན་སོམས། །རང་དོན་ཤོར་ཡང་འགྱོད་པ་མེད། ། ཉམས་དང་མཐུན་པའི་གླུ་ཆུང་ལོང༌། །ཐོ་ཅོར་ཤོར་ཡང་འགྱོད་པ་མེད། །ཡོ་ལང་སྲིས་ཀྱི་ཚོད་དང་སྦྱོར། །སྟོན་མོ་ངན་ཡང་འགྱོད་པ་མེད། །རྒྱ་མཚོའི་ནང་དུ་རྡོ་བསྐྱུར་བཞིན། །ཕྱིར་མི་ལྡོག་པའི་ཆོས་ཤིག་འཚལ། །ཏཱ་ལའི་མགོ་བོ་བཅད་པ་བཞིན། །སྐྱེ་བ་མེད་པའི་ཆོས་ཤིག་འཚལ། །མུན་པའི་ཚོགས་ལ་སྣང་བ་བཞིན།།གཉེན་པོར་འགྲོ་བའི་ཆོས་ཤིག་འཚལ།།རིག་བྱེད་བྲམ་ཟེའི་སློབ་མ་བཞིན། །ལུང་གིས་ཟིན་པའི་ཆོས་ཤིག་འཚལ། །གསེར་ལ་ནག་ཚུར་བཏབ་པ་བཞིན། །གྲོགས་སུ་འགྲོ་བའི་ཆོས་ཤིག་འཚལ། །ལྷ་ཁང་ནང་གི་སྒོ་སྲུང་དེ། ། བརྡེག་བརྡེག་འདྲ་ལ་མི་བརྡེག་གོ །མངའ་ཐང་རྒྱས་པའི་ཁྱིམ་པ་དེ། །སྐྱིད་སྐྱིད་འདྲ་ཡང་སྡུག་པ་ཡིན། །དཀའ་ཐུབ་བྱེད་པའི་ཆོས་པ་དེ། །སྡུག་སྡུག་འདྲ་ཡང་སྐྱིད་པ་ཡིན། །སྦྱིན་པ་བཏང་བའི་ལོངས་སྤྱོད་དེ། །འཛད་འཛད་འདྲ་ཡང་འཕེལ་བ་ཡིན། །སངས་རྒྱས་སེམས་ཅན་མཉམ་པ་ལ། །སྐྱིད་སྡུག་ཁྱད་རེ་ཆེ་ཞིག་བྱུང་། །བདག་དང་གཞན་དུ་མཉམ་པ་ལ། །ཆེད་འཛིན་ཁྱད་རེ་ཆེ་ཞིག་བྱུང༌། ། དགྲ་དང་བུ་རུ་མཉམ་པ་ལ། །བྱམས་སྡང་ཁྱད་རེ་ཆེ་ཞིག་བྱུང༌། །མི་ལུས་ཐོབ་པར་མཉམ་པ་ལ། །རྒྱལ་ཕམ་ཁྱད་རེ་ཆེ་ཞིག་བྱུང༌། །མི་ལུས་ཐོབ་པའི་སྐྱེས་བུ་ཀུན། །སྡིག་པའི་ལས་ལ་མ་དགའ་མཛོད། །ཚེ་འདིའི་དུཿཁ་མི་བཟོད་པར། །ངན་སོང་དུཿཁ་སྨོས་ཅི་དགོས། །དགེ་བ་བྱེད་པ་ཐམས་ཅད་ལ། །ལྟ་བ་བསྔོ་བས་ཟིན་པར་མཛོད། །ཟག་བཅས་དགེ་བར་མི་གཏང་འཚལ། །འཁོར་བ་པ་ལ་བདེ་བ་མེད། །རང་ལ་དེ་དོན་མི་གནས་པར། །ཞལ་ཏ་བྱས་པས་ཅི་ལ་ཕན།།ཚེ་འདིའི་འདུ་ཤེས་མ་ལོག་པར། །ཆོས་སྒོར་ཞུགས་པས་ཅི་ལ་ཕན། །སྐྱེ་ཤིའི་འཇིགས་པ་མེད་པ་ལ། །གདམས་ངག་བསྟན་པས་ཅི་ལ་ཕན། །རྣམ་རྟོག་སྐྲ་ལོ་མ་བྲེགས་པའི། །མགོ་སྤུ་བྲེགས་པས་ཅི་ལ་ཕན། །ཐ་མལ་འདུ་ཤེས་མ་བསྒྱུར་བར། །གོས་མདོག་བསྒྱུར་བས་ཅི་ལ་ཕན། །བླ་མ་དམ་པ་མ་བསྟེན་པར། ། རང་ཡུལ་སྤངས་པས་ཅི་ལ་ཕན། །གདམས་ངག་ཉམས་སུ་མ་བླངས་བར། །ཐོས་བསམ་བྱས་པས་ཅི་ལ་ཕན། །འཆི་བའི་དུས་ལ་བབས་པ་ན། །ཆོས་མིན་ཕན་པར་མི་གདའོ། །ལར་འདོད་ཅན་བླ་མ་གཡོ་སྒྱུ་ཅན།།ཟབ་མོའི་གདམས་ངག་གནང་དུས་མེད། །དྲང་དོན་བསླུ་བྲིད་བརྫུན་པོ་ཆེ། །ངེས་པའི་དོན་དང་མཇལ་དུས་མེད། །འཁོར་བའི་དུཿཁ་ཚན་པོ་ཆེ། །མྱ་ངན་འདས་པ་ཐོབ་དུས་མེད། ། གཏི་མུག་མུན་ནག་ཚབས་པོ་ཆེ། །ཡེ་ཤེས་ཉི་མ་འཆར་དུས་མེད། །སྒྱུ་མ་ལྟ་བུའི་དོན་རྟོགས་ན། །བདེན་ཚིག་རྩད་ནས་ཆོད་པ་ལགས། །སྐྱེ་བ་མེད་པའི་དོན་རྟོགས་ན། །འཁྲུལ་བ་རྩད་ནས་ཆོད་པ་ལགས། །རྒྱུ་དང་འབྲས་བུའི་དོན་རྟོགས་ན། །དྲང་དོན་རྩད་ནས་ཆོད་པ་ལགས། །ནམ་མཁའ་ལྟ་བུའི་དོན་རྟོགས་ན། །ངེས་དོན་རྩད་ནས་ཆོད་པ་ལགས། །སྟོང་པ་ཉིད་ཀྱི་དོན་རྟོགས་ན། །རྣམ་རྟོག་རྩད་ནས་ཆོད་པ་ལགས། །བླ་མ་དམ་པའི་ཐུགས་ཟིན་ན། །གདམས་ངག་རྩད་ནས་ཆོད་པ་ལགས། །ཇི་ཙམ་པ་ཡི་ཆོས་ཤེས་ཀྱང༌། །གདམས་པའི་སྣོད་དང་མི་ལྡན་ན། །ལྟ་བ་རྟོགས་པར་མི་གདའོ། །ཐ་སྙད་སྤྲོས་པ་མ་ཆོད་པའི། །འཇིག་རྟེན་གཡེང་བས་མ་གཡེངས་ཤིང༌། །གཅིག་པུར་སྡོད་ཅིག་མ་ནུས་ན། །དངོས་གྲུབ་ཐོབ་པར་མི་གདའོ། །འཁོར་དང་ཟང་ཟིང་སྤོངས་ལ་ཐོང༌། །དོན་གྱི་བཅུད་ཐིགས་མ་རྟོགས་ན། །ཐ་སྙད་སྦུན་ལ་སྙིང་པོ་མེད། །ཆོས་བརྒྱད་གཡེང་བས་མ་ཁྱེར་བར། །བྱ་བ་ཐོང་ལ་ཉམས་སུ་ལོངས། །ལྟ་བ་སྒོམ་པ་འབྲེལ་ལམ་ལྟོས། ། སྤྱོད་པ་དུས་དང་འབྲེལ་ལམ་ལྟོས། །གདམས་ངག་ལུང་དང་འབྲེལ་ལམ་ལྟོས། ། ཆོས་དང་གང་ཟག་འབྲེལ་ལམ་ལྟོས། །མཉམ་གཞག་རྗེས་ཐོབ་འབྲེལ་ལམ་ལྟོས། །བླ་མ་བརྒྱུད་པར་འབྲེལ་ལམ་ལྟོས། །ལར་མདོ་རྒྱུད་ཚིག་ལ་ཐུག་པ་མེད། །ད་ནི་ཚིག་འཕྲོ་གཅོད་ལས་ཆེ། །དོན་ལ་སྒྲོ་འདོགས་ཆོད་ནས་གདའ། །ད་ནི་ལྟ་འཕྲོ་གཅོད་ལས་ཆེ། །འཇིག་རྟེན་བྱ་བས་དགོས་པ་མེད། །ད་ནི་གཡེང་བ་སྤངས་ལས་ཆེ། །འཆི་བདག་གཤིན་རྗེ་བློ་ལྟོས་མེད།།ད་ནི་ཉམས་སུ་ལེན་ལས་ཆེ། །ནམ་འཆི་ཆ་མེད་བརྩོན་འགྲུས་བསྐྱེད། །སྐྱིད་ན་བླ་མའི་བཀའ་དྲིན་ཡིན། །སྡུག་ན་སྔོན་གྱི་ལས་འཕྲོ་ཡིན། །རྒུད་ན་ཞུམ་པར་མི་བགྱིད་ཅིང༌། །འབྱོར་ན་དྲེགས་པར་མི་བགྱིད་འཚལ། །ཆོས་སྒོ་བརྒྱད་ཁྲི་བཞི་སྟོང་ལས། །དད་པ་ཅན་གྱི་གང་ཟག་གིས། །སྡིག་ལས་ལྡོག་པ་དེ་ཡིན་མོད། །དགེ་བའི་བྱ་བར་འཇུག་དགོས་ལ། །བྱར་མེད་བློ་དང་ལྡན་དགོས་ཀྱིས། །ཆོས་ཀྱི་བྱ་བའང་ཞོག་ལ་ཐོང༌། །ཆོས་ལ་སྨོད་པ་མ་ལགས་ཏེ། །གང་ཟག་ལ་ཡང་གཤེ་མ་ལགས། །ཆོས་དང་གང་ཟག་འཛོལ་བ་མཐོང༌། །དེ་ཡང་ཇི་ལྟར་མཐོང་ཞེ་ན། །ཐོས་ཆུང་ཤེས་རབ་ཞན་པ་ཡིས། །གང་ཟག་ཆོས་ཀྱིས་བསླུས་པ་མཐོང༌། །རྟོགས་པའི་དོན་དང་མི་ལྡན་པར། །ཆོས་དང་གང་ཟག་སྒྲོ་སྐུར་ཆེ། །རྣམ་རྟོག་སྲིན་བུའི་ཁ་ཆུས་གཏུམས། །ང་བཟང་བདུད་ཀྱི་ལྕགས་ཀྱུས་ཟིན། །དུ་མ་རོ་གཅིག་གནད་དང་བྲལ། །བཀའ་གདམས་ཆོས་ཀྱང་ཞོག་ལ་ཐོང༌། །དགེ་སྡིག་བླང་དོར་མི་ཕྱེད་པས། །མི་ཤེས་བཞིན་དུ་མཁས་པར་བརྫུ། །དྲོད་མེད་ཐོ་ཅོའི་སྤྱོད་པ་བྱེད། །སླུ་བྱེད་རྒྱལ་ཁམས་བརྫུན་གྱིས་འགེངས། །རྣལ་འབྱོར་ཆོས་ཀྱང་ཞོག་ལ་ཐོང༌། །གསང་སྔགས་ཆོས་སུ་ཁས་བླངས་ནས། །སྨིན་ལམ་དབང་དང་མི་ལྡན་ཞིང༌། །གྲོལ་ལམ་ཐབས་ཀྱི་གནད་དང་བྲལ། །གསང་སྔགས་རྗེ་བཙུན་མ་འཇལ་བས། །ཕྱག་ཆེན་ཆོས་ཀྱང་ཞོག་ལ་ཐོང༌། །ཐེག་ཆེན་ཆོས་སུ་ཁས་བླངས་ནས། །སྙིང་རྗེ་བྱང་ཆུབ་སེམས་དང་བྲལ། །རྩོལ་མེད་གཞི་ཡི་ཆོས་སུ་ལས། །ཆོས་དང་གང་ཟག་འབྲེལ་བ་མེད། །རྫོགས་ཆེན་ཆོས་ཀྱང་ཞོག་ལ་ཐོང༌། །ཕུང་པོ་གཞི་མེད་རི་བོང་རྭས། ཁྱད་པར་ཁ་མིག་གཉེར་མ་བགྲང༌། །མཚན་གཞི་མེད་པར་མཚན་ཉིད་ཚོལ། །མངོན་པའི་ཆོས་ཀྱང་ཞོག་ལ་ཐོང༌། །འཁྲུལ་སྣང་དངོས་མེད་བསླུ་བ་ལ། །དོན་མེད་འགལ་འགལ་འབྲེལ་རྩིས་བྱེད། །སེམས་ལ་མི་ཕན་འཆི་ཁར་བསླུ། །ཚད་མའི་ཆོས་ཀྱང་ཞོག་ལ་ཐོང༌། །འཁྲུལ་སྣང་བདེན་འཛིན་ཁོང་སྐྲན་ཅན། །སྟོང་ཉིད་ཁས་ལེན་སྙིང་པོར་འཛིན། ཁྱབ་པ་ཕྱོགས་ཆོས་རྩོལ་སྒྲུབ་ཅན། །དབུ་མའི་ཆོས་ཀྱང་ཞོག་ལ་ཐོང༌། །ཐ་སྙད་ཚིག་ལ་མི་ཚེ་བསྐྱལ། །མཁས་ཀྱང་སེམས་ཀྱི་དོན་མི་ཤེས། །འཆི་ཁར་རྨོངས་པའི་ལུས་སུ་འཆི། །མཚན་ཉིད་ཆོས་ཀྱང་ཞོག་ལ་ཐོང༌། །སློབ་དཔོན་མཚན་ཉིད་མི་ལྡན་པར། །གསུམ་ལྡན་ཆོས་ཀྱིས་འབྲེལ་བར་བྱེད། །འདོད་ཆེན་ཆོས་ལ་རིན་ཐང་འདེབས། །དམ་མེད་བླ་མའི་ཇོ་མོ་སྤྱད། །ཐབས་མེད་སྦྱོར་སྒྲོལ་གཉིས་ལ་ཞེན། །སྔགས་པའི་ཆོས་ཀྱང་ཞོག་ལ་ཐོང༌། །ཚུལ་འཆོས་ལུས་ངག་བཙོན་དུ་འཛིན། །སེམས་ཉིད་ལྟ་སྒོམ་དོན་དང་བྲལ། །དོན་མེད་དཀའ་ཐུབ་ངོ་ལྐོག་ཅན། །བཙུན་པའི་ཆོས་ཀྱང་ཞོག་ལ་ཐོང༌། །ཐོས་བསམ་མ་བྱས་གླེན་སྒོམ་བྱེད། །སྡོད་ན་ཚེམས་དྲུབས་མཁར་ལེན་བྱེད། །གྲོང་དུ་འགྲོ་ན་ཚུལ་འཆོས་བྱེད། །ཐུན་ཞབས་བྱིང་རྨུགས་གཉིད་དུ་གཏོང་། །ལྟ་ན་ཁུར་གྱི་འོག་ཏུ་ལྟ། ཁུར་ཅན་མཚམས་ཀྱི་ནང་དུ་གཏོང༌། ཁུར་མེད་སྒོ་ཡི་ཕྱི་རུ་སྡོམ། །དད་ཟས་ནོར་གྱིས་ཚ་སྲིན་གསོ། །སྒོམ་ཆེན་ཆོས་ཀྱང་ཞོག་ལ་ཐོང༌། །ཆོས་ཟབ་བཤད་ན་གོ་བ་མེད། །འབྲེལ་མེད་ལོང་གཏམ་བཞད་གད་དང༌། །སླུ་བྱེད་བྲོ་དང་གླུ་ལ་དགའ། ཁ་ཆོས་ཁ་ལྟ་གཡོ་སྒྱུ་ཅན། །ཡ་མ་ཁ་མཆུ་ཕྲ་མ་སྐྱེལ། །ཐོབ་ན་ཁྱིམ་མཚེས་ནང་ནོར་བརྐུ། །བྱར་མེད་ཁྱིམ་སོ་རླུང་ལ་བསྐུར། །ཉ་མའི་ཆོས་ཀྱང་ཞོག་ལ་ཐོང༌། ཁེ་གྲགས་འཐབ་རྩོད་འཚོ་སྐྱོང་དང༌། །ཚོལ་ཁྲོ་དུཿཁ་བྱུར་གྱི་ཚང༌། །དགེ་བའི་ཆོས་ལ་རྒྱབ་ཀྱིས་ཕྱོགས། །དོན་མེད་མི་ཚེ་སྡུག་ལ་སྐྱེལ། །འགྲོ་ས་ངན་སོང་གསུམ་ལས་མེད།ཁྱིམ་པའི་ཆོས་ཀྱང་ཞོག་ལ་ཐོང༌། །དང་པོ་སྡིག་གི་བྱ་བ་ཐོང༌། །བར་དུ་འཇིག་རྟེན་བྱ་བ་ཐོང༌། །ཐ་མ་ཆོས་ཀྱི་བྱ་བའང་ཐོང༌། །བྱ་བཏང་རྣལ་འབྱོར་བློ་རེ་བདེ། །ནོར་སོགས་སྒོམ་ཆེན་ཁྱིམ་པ་ཡིན། །མཚན་བཅས་སྒོམ་པ་རྣམ་རྟོག་ཡིན། །ལུས་ངག་དགེ་སྦྱོར་ཚུལ་འཆོས་ཡིན། །བྱར་མེད་ཚོགས་དྲུག་ལྷུག་པར་ཞོག །ཆགས་ན་ལྷ་ལ་ཆགས་ཀྱང་འཆིང་། །འདོད་ན་སངས་རྒྱས་འདོད་ཀྱང་འཁྲུལ།།ཞེན་ན་ཆོས་ལ་ཞེན་ཀྱང་བསླུ། །རིག་པ་དབྱིངས་ཀྱི་ངང་ལ་ཐིམ། །གོ་བ་རྣམས་ལ་གདམས་ངག་ཡིན། ། སེམས་སྟོང་པའི་ནང་ན་རིག་པ་འཕྱོ། །གཟུང་འཛིན་མཚན་མ་རང་སར་གྲོལ། །ཕྱོགས་རིས་ཞེ་འདོད་མིང་ཡང་མེད། །ལྟ་བ་ཐག་ཆོད་བློ་རེ་བདེ། །སྒོམ་མེད་ནང་ན་ཡེངས་མེད་འཕྱོ། །རྣམ་རྟོག་མཚན་མ་རང་སར་གྲོལ། །བྱིང་རྒོད་གཉིས་ཀྱི་མིང་ཡང་མེད། །སྒོམ་པ་ཐག་ཆོད་བློ་རེ་བདེ། །འགག་མེད་ནང་ན་ཤུགས་འབྱུང་འཕྱོ། །ཚུལ་འཆོས་མཚན་མ་རང་སར་གྲོལ། །བླང་དོར་བྱ་བའི་མིང་ཡང་མེད། །སྤྱོད་པ་ཐག་ཆོད་བློ་རེ་བདེ། །སྐྱེ་མེད་ངང་ནས་འཆི་མེད་འཕྱོ། །རེ་དོགས་མཚན་མ་རང་སར་གྲོལ། །འདི་དང་ཕྱི་མ་མིང་ཡང་མེད། །འབྲས་བུ་ཐག་ཆོད་བློ་རེ་བདེ། །ལྟ་བ་གཟའ་གཏད་མེད་པ་འབྱུང༌། །འཁྲུལ་བ་འཇིག་ན་འདི་ཡིས་འཇིག །ཞེ་འདོད་ཕྱོགས་རིས་མི་བདོག་པས། །གཟུང་འཛིན་མི་གནོད་ངོ་མཚར་ཆེ། །སྒོམ་དུ་མ་བཅོས་ཤུགས་བྱུང་འབྱུང༌། །ལམ་ས་ཆོད་ན་འདི་ཡིས་ཆོད། ། དམིགས་པ་གཏད་རྒྱུ་མི་བདོག་པས། །བྱིང་རྒོད་མི་གནོད་ངོ་མཚར་ཆེ། །སྤྱོད་པ་འགག་མེད་ཤུགས་བྱུང་འབྱུང༌། །ཞེན་པ་བཟློག་ན་འདི་ཡིས་བཟློག།།དགག་སྒྲུབ་འདུ་ཤེས་མི་བདོག་པས། །བླང་དོར་མི་གནོད་ངོ་མཚར་ཆེ། །འབྲས་བུ་མ་བཙལ་ལྷུན་གྲུབ་འབྱུང༌། །ཐ་སྙད་ཆོས་སྐུ་འདི་ཡིས་ཐོབ། །སྤངས་ཐོབ་འདུ་ཤེས་མི་བདོག་པས། །རེ་དོགས་མེད་པ་ངོ་མཚར་ཆེ། །རེས་འགའ་ནམ་མཁའི་མཐོངས་ན་བདེ།།མཐའ་དབུས་མེད་པའི་ངང་ལ་བདེ། །རེས་འགའ་རྒྱ་མཚོའི་གཏིང་ན་བདེ། །གཡོ་འགུལ་མེད་པའི་ངང་ལ་བདེ། །རེས་འགའ་ཉི་ཟླའི་སྟེང་ན་བདེ། །གསལ་འགྲིབ་མེད་པའི་ངང་ལ་བདེ། །རེས་འགའ་ཆུ་བོའི་གཞུང་ན་བདེ། །རྒྱུན་ཆད་མེད་པའི་ངང་ལ་བདེ། །རེས་འགའ་བླ་མའི་དྲུང་ན་བདེ། །གདམས་ངག་སྤྲོས་པ་གཅོད་ཅིང་བདེ། །རེས་འགའ་རི་ཁྲོད་གནས་ན་བདེ། །གཅིག་པུར་ཉམས་ལེན་བྱེད་ཅིང་བདེ། །རེས་འགའ་ཚོང་འདུས་དབུས་ན་བདེ། །སྣང་བ་ལམ་དུ་ཁྱེར་ཞིང་བདེ། །རེས་འགའ་རྣལ་འབྱོར་གྲལ་ན་བདེ། །ཉམས་མྱོང་རྟོགས་པ་བསྡུར་ཞིང་བདེ། །རེས་འགའ་མཛེ་སྤྲང་གསེབ་ན་བདེ། །རོ་སྙོམས་སྤྱོད་པ་བྱེད་ཅིང་བདེ། །རེས་འགའ་རྒྱལ་ཁམས་ཡངས་ན་བདེ། །ཕྱོགས་མེད་གཅིག་ལྡོམ་བྱེད་ཅིང་བདེ། །རྟག་ཏུ་གནས་ལུགས་སྟེང་ན་བདེ། །ཕྱོགས་རིས་མེད་པའི་ངང་ལ་བདེ། །དང་པོ་གྲོས་རེ་ལེགས་ཤིག་བྱུང༌། །བར་དུ་སོ་རེ་བསོད་ཅིག་བྱུང༌། །ཐ་མ་བློ་རེ་བདེ་ཞིག་བྱུང༌། །བྱ་བ་བཏང་བས་ལམ་སྣ་ཟིན། །ཅོག་གེ་བསྡད་པས་ལམ་ས་ཆོད། །མགོ་བོ་གཏུམས་པས་རྒྱང་མིག་གསལ། །སེམས་ཅན་དམྱལ་བའི་གཡང་ས་ཡང༌། །འོག་མིན་ཆོས་ཀྱི་ཕོ་བྲང་ཡིན། །ཚ་གྲང་གཉིས་ཀྱི་སྡུག་བསྔལ་ཡང༌། །སྤྲོས་དང་བྲལ་བའི་ཆོས་སྐུ་ཡིན། །ཕྱི་པ་མུ་སྟེགས་གྲུབ་མཐའ་ཡང༌། །སྙིང་པོ་དོན་གྱི་དབུ་མ་ཡིན། །བླ་མ་དམ་པའི་གདམས་ངག་ཀྱང་། །སྒྱུ་མས་སྒྱུ་མ་བསླུ་བ་ཡིན། །རང་གི་རྟོགས་པ་ཉམས་མྱོང་ཡང༌། །ཆུ་ལ་རི་མོ་བྲིས་པ་ཡིན། །ལམ་ལྔ་ས་བཅུ་ཤར་བ་ཡང༌། །རི་བོང་རྭ་གཉེར་བགྲང་བ་བཞིན། །ཕུན་སུམ་ཚོགས་པའི་སངས་རྒྱས་ཀྱང༌། །དོན་ལ་མེད་པའི་མིང་ཙམ་ཡིན། །རིགས་པས་གྲུབ་པའི་ཆོས་ཉིད་ཀྱང༌། །སྙིང་པོ་མེད་པའི་ཆུ་སྡོང་ཡིན། ། བྱར་མེད་གནས་ལུགས་རྟོགས་པ་དང༌། །ངེས་ཤེས་མེད་པའི་ཁ་ལྟ་གཉིས། ། འདྲ་ནི་འདྲ་སྟེ་ནོར་དོགས་ཡོད། །དབང་པོ་རྒྱ་ཡན་གདམས་ངག་དང༌། །ཚོགས་དྲུག་ཡན་པར་ཤོར་བ་གཉིས། །འདྲ་ནི་འདྲ་སྟེ་ནོར་དོགས་ཡོད། །ཞེན་ལོག་ཤུགས་ཀྱི་བྱུང་བ་དང༌། །ཐོ་ཅོ་སྨྱོན་པའི་སྤྱོད་པ་གཉིས། །འདྲ་ནི་འདྲ་སྟེ་ནོར་དོགས་ཡོད། །རེ་དོགས་གཏིང་ནས་ཟད་པ་དང༌། ཁོང་སྐྲན་ཅན་གྱི་འདོད་མེད་གཉིས། །འདྲ་ནི་འདྲ་སྟེ་ནོར་དོགས་ཡོད། །དགེ་བསྙེན་གྲགས་པ་རྒྱལ་མཚན་གྱིས། །ཉམས་མྱོང་གླུ་རུ་བླངས་པ་ཡིན། །མདོ་རྒྱུད་གཉིས་ལ་བརྟེན་པ་ཡིན། ། ཚིག་གི་སྡེབ་སྦྱོར་བྱས་པ་ཡིན། །སྙན་ངག་རྒྱན་གྱིས་སྤྲས་པ་ཡིན། །མཁས་པའི་ང་རྒྱལ་གཅོག་པ་ཡིན། །དད་ཅན་སྤྲོ་བ་བསྐྱེད་པ་ཡིན། །ཞེས་མགུར་དུ་གསུངས་པ་རྫོགས་སོ།། 


Written By :Tenzin

Mar 24, 2019


0 Comments

Leave a Reply

Your email address will not be published.


109 queries in 0.345 seconds.